Saudi-Arabia USA-lu milliartilikkaanik Ukrainemut nassiussipput

Saudi-Arabia Ukrainemut ikiuiniarluni maanna nalunaartoq, Saudi-Arabiamiut nutaarsiassaqartitsiviat SPA tallimanngormat taama tusarliussivoq, oqaatigineqarporlu 400 millioner dollarinik Saudi-Arabiamiut tunissuteqarsimasut.

Taakkulu koruuninngoraanni 3,06 milliarder koruuninik naleqarput.

Nutaarsiassaqartitsivik SPA ilanngullugu allappoq, Saudi-Arabiamiut kunngissaata Mohammed bin Salmanip tallimanngormat Ukrainemiut præsidentiat Volodymyr Zelenskyj telefonikkut oqaloqatigisimagaa.

Saudi-Arabiamiut kunngissaata bin Salmanip erseqqissaatigisimavaattaaq Russit Ukrainemiullu akornanni sorsunnermut sakkukillisaataasinnaasunik sunilluunniit siunissami aamma tapersiiuartarumallutik.

Taamatuttaaq erseqqissaatigalugu, Saudi-Arabia sorsunnermut tassunga isumaqatigiissitsiniarnissaminut aammattaaq piareersimasoq.

Saudi-Arabia 3 milliartinik Ukrainemut nassitsiniarluni nalunaareernerata kingorna, USA aamma sassarpoq, taakkuttaaq Ukrainemut nutaamik sakkutuunik annertusaaqqipput.

Tallimanngormammi amerikamiut naalagaaffiat, Ukrainemi sakkutooqarnermut atugassanik 725 millioner dollarinik ikiorsiillutik aamma nassitsipput.

Taakku aningaasat russit Ukrainemi inunnut sakkutuujunngitsunut sakkortoqisumik eqquineranut atorneqassasut, amerikamiut nunanut allanut ministeriat Antony Blinken erseqqissaassuteqarpoq.

Taassumattaaq erseqqissaatigaa, `kisitsit qaffakkaluttuinnarnerisigut ersertoq russit sakkutuui inunnut sakkutuujunngitsunut qanoq peqqarniitsigisut.

USA-p Ukrainemut tuttussanik aningaasanik annertusaanera, koruuninngoraanni 5,55 milliartinik naleqarput.

Tassalu imaappoq, USA manna tikillugu Ukrainemut aningaasat katillugit 140,1 milliarder koruunit tunniuppai.