Savalimmiormiu danskit naluttartuinut maligassiuisoq

 
Savalimmimiormiu 23-nik ukiulik maannamut nunarsuaq tamakkerlugu Europamil pissartanngorniunnerni tallimanik ujaminnassimasoq, danskit naluttartuinut angutinut pitsaanerpaanut maligassiuisussatut toqqarneqarsimavoq.
 
Suliniummut Great Danesimut angutit naluttartut angusarisartagaannik qaffassaanissamik siunertaqartumut peqataasussat Danmarkimi naluttartut peqatigiiffiisa kattuffiata saqqummiuteqqammerpai, Pál Joensenilu nutaatut taakkununnga ilaavoq.
 
- Pál assersuutissaalluarpoq Naalagaaffeqatigiinnilu naluttartut ataqqisaanerpaat ilagalugit, taamaammat naluttartunut inuusunnerusunut maligassiuisuullunilu siunnersuissaaq, nunanut allanut unammisartut sungiusaasuat Nick Juba savalimmiumik ilanngutitsinermut atatillugu taama oqarpoq.

AAMMA ATUARUK GIF aamma OL-imukassaaq

Pál Joensen ukiut marlussuit matuma siorna Savalimmiuni illoqarfigisamini Vagurimi naluttarfimmi sungiusartarpoq - naluttarfimmi Nuup naluttarfiata Maliup angeqqataani.
 
Taanna ullumikkut savalimmiormiut allat marluk peqatigalugit Danmarkimi naluttartut pikkorinnersaasa sungiusartarfianni Bellahøjimiittumi sungiusartarpoq, OL-milu Brasiliami 2016-imi pisussami 800 meterinut 1500 meterinullu nalunnermik unamminerni ujaminnattussatut isumalluarfigineqarluni.