Savalimmiormiut aarluaarsunnut pisassiissutinik killiliisut
Savalimmiormiut naalakkersuisuisa siunnersuutigaat, Savalimmiuni aarluarsuit qaqortat ukiumut 500-t taamaallaat pisassiissutigineqartariaqartut.
Siunnersuulli aallaqqaammut 2022-mi aammalu 23-mi taamaallaat atuutissaaq.
Taama nutaarsiassaqartitsivik AFP allappoq.
Taama siunnersuuteqartoqarneranut patsisaavoq, siorna septembarimi aarluarsuit qaqortat 1423-t piniapilunneqartutut taaneqarlutik pisarineqarsimaneri, taamanilu avatangiisinik illersuiniaqatigiiffinniit sakkortuumik Savalimmiormiut isornartorsiorneqarput.
Savalimmiunili naalakkersuisut oqaaseqaamminni erseqqissaapput, aarluarsuit Savalimmiormiunit piniagaalluartartuusut inuuniutaannullu pingaarutilinnut ilaalluartuusut.
Naallu Savalimmiuni naalakkersuisut siorna aarluarsunnik piniapiluttoqarnera naapertuilluanngitsuliornertut nalileraluarlugu ilanngullugu erseqqissaatigaat, qulaaniit isigalugu Savalimmiuni aarluarsoqassuseq ajunngitsoq.
Naalakkersuisullu allakkiaat naapertorlugu, aarluarsoqassuseq isigissagaanni ukiumut aarluarsuit 825-t pisarineqarsinnaagaluarput, taamaattorli siunnersuutigiinnarpaat 500-t kisimik pisarineqartarnissaat.
