Savalimmiormiut neriniartarfiutaat Michelin-imit nersugaq Kalaallit Nunaannut nuuppoq
Nerisassanik soqutigisalinnut neriartarfik Koks, Michelinimit marlunnit ulloriaasartaligaq Savalimmiuni matuvoq Kalaallit Nunaannullu nuuttussanngorluni. Neriniartarfik facebookimi quppernermini taama allappoq.
Neriniartarfik nutaaq Ilimanamut Ilulissat kujatinnguanniittumut inissinneqassaaq.
- Sulisutta Ilimanamut nuunnissaat qilanaaraara, Koksip piginnittua Johannes Jensen facebookimi quppernermini taama allappoq.
Neriniartarfiullu inissisimaffissaa, aamma Kalaallit Nunaanni suleqatissatik Koks-ip anguniagaanut, tassa piujuartitsinissaq tunngavigalugu periaaseqarneq tulluartuusut aamma taassuma oqaatigaa.
Piginnittorli Savalimmiunut uternissaminik ammatitsivoq.
- Koks neriuppoq Savalimmiunut angerlarsimaffimmut pissanganartumut 2024-mi utersinnaassalluni Johannes Jensen oqarpoq.
Februaarimiit Koks-ip nerianiartarfiutaani Ilimanami nerinissamut inniminniisoqalersinnaassaaq. Kisianni aatsaat upernaaru kingusinnerusukkut neriniartarfik ammarpat neriartortoqarsinnaalissaaq.
2023-p kingorna Ilimanami aamma nunatsinni nunat tamalaat nerisassioriaasaannik
neqerooruteqarsinnanerup ingerlatiinnarnissaa qulakkeerniarlugu, World of Greenlandimi Hotel Arcticimilu sulisunik nunatsinneersunik ilinniartitsinissaq eqqarsaataavoq.
Neriniartarfiup tusaamaneqarluartup nuukkallarnissaa Avannaata Kommuniani borgmesterip Palle Jerimiassenip aamma nuannaarutigaa.
- Koks-ip Ilimanami aasat marluk misileraaniarluni, ineriartortitsiniarluni ilinniarusullunilu aalajangernera tulluusimaarutigaara. Nerisassaatitta pinngortitallu nittarsaannissaanut periarfissatsialaavoq, borgmesteri oqarpoq.
Koks 2022-mi ukiut qulit angullugit nalliuttorsiussaaq.
Neriniartarfiup Michelin-imit ullorialigaassutai marluk, Savalimmiunilu inissisimanera pissutigalugit nerisassanik soqutigisallit nerisassanillu naliliillutik allaatiginnittartut nunarsuarmit tamarmit ornigussuuttarput.
Koks 2019-imi Michelin-imit ulloriaasanik marlunnik pissarsisinneqarpoq, neriniartarfiullu taakku manna tikillugu attatiinnarpai.
Aamma 2019-imi Koks-ip pisortatut igasua, Poul Andrias Ziska, Michelin-imit nersugaanermut atatillugu immikkut ittumik nersornaatisivoq. Taanna tassaavoq igasumut inuusuttumut pikkorinnerpaamut nersorinnissut.
Koks ukiut ingerlanerini Savalimmiut avataanut nuutsiartarpoq, assersuutigalugu Københavnimi Tivolimiinnikuuvoq. Singaporemilu Grand Hyattimi januaarip 23-aniit sapaatit akunnerini sisamani ammassaaq.
