Chicagomi inuit arfinillit ingerlaaqatigiit ilaannut aallaasersortoqarnerani toqutaasut
USA-mi inuiattut ippassaq ataasinngornermi ullorsiortoqarneranut atatillugu illoqarfissuarmi Chicagomi inuit arfinillit ingerlaaqatigiit ilaannut aallaasersortoqarnerani toqutaapput, allallu 38-t ikilerneqarlutik.
Politiit tusagassiortunik ataasinngornermi unnukkut katersortitsinermi taama ilisimatitsipput. Nutaarsiassaqartitsivik Reuters taama allappoq.
Saassussisuusimassangatinneqartoq - angut 22-nik ukiulik - akunnerni arlalinni ujaarineqareerluni tigusarineqarpoq.
AAMMA ATUARUK USA-mi senatip sakkunut inatsimmik sukaterinissamik siunnersuut akuerigaa
Chicagomi illoqarfiup immikkoortuani Highland Parkimi illoqannginnersami inuiattut ullorsiornermut atatillugu ingerlaaqatigiittoqarnerani aallaasersortoqartoq tamaani politiit Twitterikkut nalunaarutigaat.
Inuit qimarrapput toqqorlutillu, tv-qarfik CBS 2 oqarpoq.
USA-mi piffissami kingullermi aallaasersornerpassuaqarpoq. Texasimi illoqarfimmi Uvaldemi maajip ulluisa 24-anni pisut assersuutigineqarsinnaapput. Atuarfiit ilaanni aallaasersortoqarmat meeqqat 19-it ilinniartitsisullu marluk tassani toqutaapput, naalagaaffimmilu New Yorkimi illoqarfimmi Buffalomi pisiniarfeqarfiit ilaanni maajip ulluisa 14-ianni aallaasersortoqarmat inuit qulit tassani toqutaapput.
