SIK Namminersorlutik Oqartussallu akissarsiat pillugit isumaqatigiissuteqartut
SIK-mi ilaasortanut isumaqatigiissutit kiisami inissipput.
Isumaqatigiinniarnerit marsip 31-annili naammassineqartussaagaluarput – Namminersorlutik Oqartussalli SIK-llu isumaqatigiinniartartui septembarip pingajuanni aatsaat isumaqatigiissuteqarput.
Namminersorlutik Oqartussat SIK-lu septembarip pingajuannit ullut qulit qaangiuttut ullumikkut tusagassiuutinut nalunaaruteqarput.
- Sivisusimaqaaq, angusaqarfiusumilli isumaqatigiinniarsimavugut. Pitsanngorsagassat isiginiarsimavagut - aningaasarsiaannaat pinngikkaluarlugit atorfininnermi atugassarititaasut pingaaruteqartut allat aamma angusaqarniarfigivagut, SIK Namminersorlutik Oqartussallu tusagassiuutinut ataatsimut allapput.
- Pitsaanerulersitsinerit ataatsimut katillugit 128,2 mio kr.-nik naleqarput. Tassa imaappoq, SIK-mi akissarsiat nalingi ataatsimut katillugit 8 %-inik qaffattut, illuatungeriit nalunaaruteqarput.
AAMMA ATUARUK Erfalasut aappaluttut erfapput: Akit qaffattuartut, akissarsiat qaffanneq ajortut
Inernerit SIK-mi ilaasortanut taasissutigineqartussanngorlugit nassuinneqarput. Akuersisoqareerpat akissarsiat kingumoortumik apriilip aallaqqaataat 2022 aallarnerfigalugu nalimmassarneqassallutik.
Pisortani sulisunut isumaqatigiissutit nutarterneqartut makkuninnga ilaqarput:
- SIK-mi isumaqatigiissutit malillugit atorfeqartut meerartaarnermi kingorna sulinngiffeqarnerminni tamakkiisumik akissarsiaqarsinnaapput. Arnat SIK malillugu atorfeqartut sapaatini akunnerni 18-ini sulinngiffeqarsinnaatitaasaraluarput. Taakku manna sapaatini akunnerni 40-ni tamakkiisumik akissarsiaqarsinnaatitaalissapput.
- SIK-mi ilaasortat inoqutigiittut atorfininnerminni angalanissaminnut akiliunneqarsimasut soraarniuteqarnerminni angerlarnissaminnut akiliunneqartalissapput.
- Qanigisaasup pinartumik nappaateqarnerani imaluunniit toqukkut qimagunnerani kiffaanngissuseqarluni akissarsiaqartitaanissaat siusinnerusumik pisalissaaq.
- Qaammammusialittut atorfeqartunut ilaqutaasunullu akiliunneqarluni angalanissamut, sulinngiffeqarluni angalanissamut akiliunneqarnissamut aningaasaateqarfimmik immikkut pilersitsiffigineqartussamut tapiissuteqarfigineqartalernissaanik periarfissiisoqassaaq. Immikkut pilersitsiffiusussat kikkuuneri allassimanngilaq.
- SIK-mi ilaasortat pisortanilu sulisitsisut tapit soraarnerussutisiaqaataasinnaasut amerlineqarnissaat qitiusissimavaat. Tapit suut pineqarnersut allassimanngilaq.
- Tunngaviusumik akissarsiat SIK-mi ilaasortanut tamanut pitsaanerulersinneqarput. Tassani pineqartut ilagaat nunaqarfinni peqqinnissaqarfimmi sulisut, isumaginninnermut ikiortit, arnarsiat, talittarfinni mittarfinnilu sulisut assigisaallu akissarsiatigut immikkut qaffaavigineqarput. Akissarsiatigut qaffaaneq qanoq annertutiginersoq allassimanngilaq.
