Qeqqani borgmesteri sipaarniarneq pillugu: Ulluinnarni inuuneq kalluarneqassanngilaq
Qeqqata kommunia ukiup sinneranut aappaagumullu sipaartussanngorpoq.
Ukiuni kingullerni ingerlatsinermut aningaasartuutit malunnartorujussuarmik qaffakkiartorsimasut, Qeqqata kommuniani Siumut tunuliaqutaralugu borgmesterip Malik Berthelsenip erseqqissaatigaa.
Qeqqata Kommuniani 2022-mi sipaarniuteqarfigineqartut ilaat
- Sisimiuni Maniitsumilu unnuisarfiit - 1 million koruunit
- Maniitsumi ikiorsiissutit – 2 millionit koruunit
- Maniitsumi innarluutilinnut pisartagaqartitsineq - 1,5 millionit koruunit
- Asfaltilersuineq - 200.000 koruunit
- Arsaattarfinnik aserfallatsaaliinissaagaluit tamarmik taamaatipput
- Qatserisartoqarneq - 225.000 koruunit
- Ilinniartitaaneq - 7,2 millionit koruunit
- Aningaasaqarnermik ingerlatsineq - 2,5 millionit koruunit
Missingersuummi tamarmiusumi procentinik marlunnik sipaartoqassaaq. Taakkulu sapaatip-akunnerata aallartinnerani kommunalbestyrelseip ataatsimiinnerani partiit amerlanerussuteqartut Siumut, Inuit Ataqatigiit aammalu Atassutip akuersissutigaat.
Ikiuutit innarluutilinnullu akigititat annikinnerulissasut
Assersuutigalugu Atugarissaarnermut Ataatsimiititaliami 5,6 millioni koruunit ukioq manna sipaarneqassapput, aappaagulu 8 millioni koruunit sipaarneqassallutik. Tamatuma nassatarissavaa, Sisimiuni Maniitsumilu akunnittarfiit sivikinnerusumik ammasalernissaat, aammalu Maniitsumi ikiuutit innarluutilinnullu akigititat annikinnerulissallutik.
Borgmester Malik Berthelsen naapertorlugu, sipaarniarneq sapinngisamik innuttaasunut ”annernannginnerpaaffimminiitinniarneqarpoq”.
AAMMA ATUARUK Qeqqata Kommuniani unnuisarfiit, ikiorsiissutit innarluutillillu sipaarniuteqarfigineqangaatsiartut
- Sapinngisamik innuttaasunut ”annernannginnerpaamik” ujarlersimavugut sipaarniarnermilu isumaqarsimavugut tassuunakkut sipaarniartariaqarluta. Sapinngisamik sulisunik soraarsitsinaveersaarluta kisianni kommunep susassaqarfiini assigiinngitsuni ammasarfiit sivikillisinneqassapput, Malik Berthelsen oqarpoq.
Taassuma erseqqissaatigaa, sivikinnerusumik ammarsarfiliinikkut akunnermusialinnut tamanna malunnassasoq.
- Sipaarniuteqarnissarput avaqqussinnaanngilarput, taamaasiunngikkuttami taava kingusinnerusukkut innuttaasunut tamanut annernarnerusunngorluni tuttussaavoq, Malik Berthelsen oqarpoq.
Atugarissaarnermut tunngasumi sipaarniutaasussat saniatigut ilinniartitaanermut tunngasut aamma sipaarniutigineqassapput, ukioq mannamullu 7,2 millioni koruunit nassaariniarneqartariaqarlutik, teknikkeqarnermullu tunngasumi aningaasat millionit aappaata qeqqanik amerlassusillit ukioq naatinnagu nassaarineqartariaqarput.
Naluttarfiit pilersaarutaaginnassapput
Qeqqata kommunia annertuumik sipaarniartussanngoraluarluni Sisimiuni Maniitsumilu naluttarfiliortitsinissamik pilersaarutit ingerlatiinnarniarpai. Taakkulu katillutik 216 millioner koruuninik naleqartussaapput.
Pilersaarutit naapertorlugit naluttarfiliassat aningaasaateqarfinnit aningaasalerneqassapput, Qeqqatali kommunia nammineq aamma akiligassap 10 procentianik akiliisussaavoq, taannalu 21.630.000 koruuniuvoq. Naluttarfiilli atulerpata kommunip ukiumut ingerlatsineq ingerlatissavaa, naatsorsuutigineqarporlu ukiumut 5 aamma 9 millioner koruuninik naluttarfiit naleqartassasut.
Qeqqata kommuniani borgmesteri Malik Berthelsen naapertorlugu, naluttarfiliassat salliutinneqarnissaat pingaartuuvoq.
- Naluttarfiit sananeqarnissaat aalajangiusimaannarparsi, taakkulu sanaartornerisa 10 procentiat Qeqqata kommuniata akilertussaavaa, sooruna naluttarfiit salliutikkusukkisi?
- Sipaarniarfigisassagut tassapput ulluinnarni ajornannginnerpaamik "annernannginnerpaatut" aallerfigisinnaasatut isumaqarfigisagut, isumaqarpunga aamma siunissami naluttarfiit innuttaasut amerlanerpaartaasa taakku pilersinnissaat kissaatigigaat, Malik Berthelsen oqarpoq.
