Sisimiuni Aasiannilu killilersuisoqalertoq

Corona pillugu killilersuutit Sisimiuni Aasiannilu aqagu ullaakkut nalunaaqutaq arfinermut atuutilissapput.

Tuniluunnerup suminngaanneerneranik ilisimaneqanngitsup paasineqarnera pissutaasoq, Nunatsinni Nakorsaaneqarfik allappoq.

Taamaammat aqqaneq marlunnik sinnerlugilluunniit ukiullit inini tamanit iserfigineqarsinnaasuni covid-19-imut tamakkiisumik akiuussuserneqarsimanermut, siusinnerusukkut tunillatsissimanermut imaluunniit covid-19-mut misissorneqarsimanermut akuerisaasumut uppernarsaammik takutitsisalissapput.

AAMMA ATUARUK Misissuisarfiit napparsimmaviillu ilungersungaatsiarmata kikkunnut tamanut PCR-imik misissuisoqartarunnaartoq

Aqqaneq marlunnik sinnerlugilluunniit ukiullit tamanit iserfigineqarsinnaasuni kikkunniillu tamanit ilaaffigineqarsinnaasuni qanermut assiaquteqartassapput.

Taavalu tamanit ornigarneqarsinnaasuni isersimasinnaasut amerlanerpaaffissalerneqassapput. Tassa imaappoq qatserisartut amerlanerpaaffiusinnaasutut akuerisaata affaannaat isertinneqarsinnaassapput.

Killilersuutit tunillaassuunnerup uninnissaata tungaanut imaluunniit tunillaassuunnerup suminngaanneernerata ilisimaneqalernissaata tungaanut atuukkallassapput.

Inoqarfiit killilersuiffiusut amerliartortut 

Aasiaat Sisimiullu killilersuiffiusuni kisimiinngillat.

Killilersuutit aamma inoqarfinni makkunani atuupput: Ilulissat, Kangerlussuaq, Maniitsoq, Nuuk, Qasigiannguit, Upernavik, Tasiusaq, Upernavik Kujalleq, Nutaarmiut, Nuussuaq, Innaarsuit, Naajaat, Aappilattoq, Kangersuatsiaq, Kullorsuaq, Narsaq.

Tamatuma saniatigut neriniartarfiit imerniartarfiillu unnukkut nalunaaqutaq qulinit ullaassakkut nalunaaqutaq tallimanut matoqqasarnissaat pillugu killilersuutit nuna tamakkerlugu ataasinngormat atuutilerput.

Killilersuutit taakku sapaatit akunnerini marluugallartuni atuussapput.