Sisoraaserluni ooqattaasarneq: Ukaleq Slettemarkip ukioq unammiffiusoq aallartillugu pingajuattut inissippoq
21-nik ukiulik Ukaleq Slettemark ukiumi unammiffiusumi inersimasuni unammeqataanermini Norgemi aallartilluarpoq.
Ippassaq sapaammi ualikkut naatsumut 7,5 kilometerimut unamminermi pingajuattut inissippoq.
Unamminermi tassani siornatigut OL-rfiusup Lillehammerip ungasinngisaani Sjusjøenii pisumi marloriarluni ooqataasartoqarpoq.
AAMMA ATUARUK Ukaleq uniunngereerluni: Unammereernitsinni nunarsuarmi kakkannerpaat pilluaqqusiartorput
Ooqattaasarnerni tamaginni Ukaleq Slettemark uniunngivippoq Norgelu sinnerlugu nunanut allanut unammisartumit Karoline Knottenimit unamminermi ajugaasumit sekundinik 15-iinnarnik kigaannerulluni.
Ukioq unammiffiusoq neriunarpoq
- Suut tamaasa iluatsippakka. Unamminerimmi tamaasa taamatu eqqaasinnaaneq ajorpakka, Ukaleq Slettemark KNR-mut oqarpoq.
- Aappaatigut qasujaassutsikkut killiffiga tupaallaatigaara ukiumut unammiffiusumut piareersarnera pitsaanerpaajunikuunngimmat. Unammisaqattaarnerit aallartinneranni qasujaassusera aamma pitsaanerpaaffimmiittussanngilaq aatsaat kingusinnerusukkut qasujaannerpaaffik angorusukkakku, Ukaleq Slettemark suli inuusuttuni unammisartuusoq oqarpoq.
Ukiumi unammiffiusumi pisussaq annertooq tassaavoq inuusuttut martsimi Kazakhstanimi nunarsuarmi pissartanngorniunnissaat. Inersimasut unamminerini IBU Cupimi aamma nunarsuarmi kakkannerpaat unammineranni World Cupimi peqataassamaarpoq.
AAMMA ATUARUK Ukaleq Slettemark qasoqqagami World Cup-mi peqataanngiinnalerpoq
- Siorna ukiup taamaasinerani ukioq unammiffiusoq aallartimmat unammilluarpallaanngilanga. Taamaattoq sungiusarluarnikkut IBU Cup aallartillugu unammisoqarmat arfineq aappaattut inissippunga. Taamatut ingerlaqqissinnaaguma neriunartorujuuvoq, Ukaleq Slettemark oqarpoq.
Ippassaq unammineq tamakkerlugu uani isiginnaarneqarsinnaavoq.
