Siumut Demokraatillu borgmesterinngortoq tupaallaatigaat

- Tupaallaatigivarput, Kommuneqarfik Sermersuumi Siumup gruppiani siulittaasoq, Inga Dora G. Markussen KNR-mut oqarpoq.

Juaaka Lyberth Uju Petersenilu borgmesterinngortussamit Avaaraq S. Olsenimit siorna qinersinermi qinersisartunit taaguunneqarnerupput. Tamannarpiarlu tunngavigalugu Siumup taakkua arlaat borgmesterinngortussatut innersuunneqassasoq ilimagisimagaluarpaa.

AAMMA ATUARUK IA: Taamaattumik Avaaraq S. Olsen borgmesterertaarerusupparput

- Naatsorsuutigisimagaluarparput qinigaanerpaap tullii arlaat taakkua toqqarneqarnissaat.

Taakkua tupaallattutuaanngillat. Illuatungiliuuttoqataasut, Demokraatit aamma taamak naatsorsuuteqarsimanngikkaluarput.

- Tupaallappunga, tamanna nassuerutigisariaqarpara. Qinerneqarnerusut allat innersuunneqarnissaat naatsorsuutigisimagaluarpara, Demokraatit gruppianni siulittaasoq Justus Hansen KNR-mut oqarpoq.

Siumut: Qanoq politikkeqarpa?

Avaaraq S. Olsen borgmesterissatut innersuunneqarmat Siumumut ilaasortat arfinillit akuersinatillu itigartitsinngillat. Taakkua taaseqataanngillat.

- Avaaraq S. Olsenip ataatsimiinnerni ivertinneqarattali qanoq politikkeqarnersoq qanoq isumaqarnersoq iluamik tusarnikuunnginnatsigu. Taamaattumik nalilersoruminaatsipparput uani qanoq borgmesteritut issiavimmut piguni siumoortumik uagut ilisarisimannginnatsigu, Inga Dora G. Markussen oqarpoq.

AAMMA ATUARUK Kommuneqarfik Sermersuumi borgmesterinngortussaq: Suliassaq annertoqaaq

Taakkua borgmesterissamut tatiginninnerlutik tatiginninnginnerlutilluunniit oqarsinnaanngitsut, gruppimi siulittaasup ilanngullugu oqaatigaa.

Ineqarneq pillugu suliaq aalajangiisuusoq

Demokraatit, Inuit Ataqatigiit Nalerarlu assigalugit innersuussinermi akuerseqataapput. Taakkua akuersinerannut ineqarneq pillugu suliaq oqallisaaqisoq aalajangiisuuvoq.

- Kommunalbestyrelse tamarmiusoq Naalakkersuisullu ineqarneq pillugu suliami suleqatigiittariaqartut tassunga erseqqissorujussuarmik tikkuarparput. Tassungalu ammassorujussuummat taanna toqqarparput, Justus Hansen oqarpoq.

AAMMA ATUARUK Avaaraq Olsen Kommuneqarfik Sermersuumi borgmesterinngussaaq

Borgmesterinngortussap kommunep ukioq mannamut missingersuutai 2.1 milliardit koruuniusut qullersaalluni akisussaaffigissavai.