Siumut Kommuneqarfik Sermersuumi suleqatigiinnissamut isumaqatigiissusiaannut tupaallanngilaq

Kommuneqarfik Sermersuumi kommunalbestyrelsit suleqatigiilersut partiit ikinnerulerput.

Inuit Ataqatigiit Nalerarlu suleqatigiilerniarlutik sapaatiummat isumaqatigiipput.

Tamanna Siumut gruppiannit tupaallaatigineqanngilaq.

- Tusaatissatut tiguarput. Suleqatigiikkunnaarsimasut novembarip 22-ani ataatsimiikkatta paasivarput. Tassunga ingerlasoqartussaanera takusinnaareerparput, Sermersuup kommunalbestyrelsiani Siumut gruppiani siulittaasoq, Ingadora Gudmundsdottir Markussen oqarpoq.

AAMMA ATUARUK Ataatsimut isigalugu: Kommunalbestyrelsit nutaat aaku

Taanna Inuit Ataqatigiit Naleqqallu suleqatigiissutigissallugit isumaqatigiissutigisaat pillugit ima oqarpoq:

- Isumaqatigiissut atuarlugu taamaallat nutaarsissaq nuannersoq tassaavoq Ittoqqortoormiini massakkut tigussaasunngorlugit suut suliarineqartussaanerit uani qinigaaffimmi allaqqapput.

Soorunami nuannaarutissaavoq tamanna ukkatarineqalermat.

IA-p Naleqqallu Ittoqqortoormiini inissiat aserfallatsaalillugit nutarterneqarnissaat nutaanillu inissialiornissaq isumaqatigiissutigaat.

Aserfallatsaaliuinissamut nutarterinissamullu pilersaarut tamatumunnga tunngaviliisussaq annertooq 2022-mi aallartinneqassasoq, kiisalu ammeriveqalernissaq illuaqqanillu piniariartarfinnik aserfallatsaaliuillunilu nutaanik sanasoqassasoq, suleqatigiilersut allapput.

AAMMA ATUARUK Charlotte Ludvigsenip borgmesteriuinnarnissaa Naleqqap taperserallaraa

Ataatsimulli isigalugu kommunalbestyrelsemut qinikkat suleqatigiilluarnissaat, partiip Kommuneqarfik Sermersuumi illuatungiliuttuusup Siumup gruppimi siulittasua Inga Dora Gudmundsdottir Markussen oqarpoq.

- Tamat oqartussaaqataaneranni kommunalbestyrelsimi tamatta immersueqataanissarput pingaaruteqarpoq. Tassami uagut innuttaasut sinnerlugut kommunalbestyrelsemi issiavugut pitsanngortitassanik aamma tamatta tunniussassaqarluta. Neriuppunga tamanna ingerlaannassasoq, Kommuneqarfik Sermersuup kommunalbestyrelsiani Siumut gruppiata siulittaasua, Inga Dora Gudmundsdottir Markussen oqarpoq.