Sjællandimi sialussuartoq
Danmarkip kippasissortaani ippassaq sialussuarnera Danmarkip kangisissortaanut arfininngornermi annguppoq.
Jyllandimi Herningip Skjernillu akornanni qimuttuitsut aqqutaata ataani nuna sialussuarneranit eqqorneqarpoq.
Allattoq Ritzau
aggustip 27-at 2022 18:33
Danmarkimi ippassaq ullumilu siallingaatsiarpoq, pingaartumik kangisissuani ullumi siallingaatsiarluni.
DMI taama ilisimatitsivoq, sumiiffiit ilaanni sialussuarlunilu kallersinnaanissaa ilimasaarutigineqarluni, pingaartumik Sjællandimi.
Jyllandimi aallartittumik tallimanngornermi sialussualerpoq, Fynimullu kingorna anngulluni. Kommunit ilaanni tamaani sialussuarpoq.
- 30 aamma 50 millimeterit akornanni siallersinnaanissaa ilimasaarutigaarput, tassa akunnerit 24-t ingerlaneranni taama siallertigissangatipparput, DMI-mi silasiortoq Mette Wagner oqarpoq.
Biilerniaraanni mianersortoqarnissaa DMI-p kaammattuutigaa.
Danmarkimi ippassaq ullumilu sialussuariarluni ualeq manna unnummannalu siallerpallaarunnaariartorpoq.
