Sondre Slettemark Norgemi pissartanngorniunnerni arlalinnik ujaminnattoq
Sondre Aputsiaq Slettemarkip norskit sisoraaserlutik ooqattaasartuisa pissartanngorniunneranni sukataarluni peqataanini nuanninaavippasippaa.
Taanna unamminerni pingasuusuni peqataagami marlunnik siilvinnappoq ataatsimillu bronzennappoq. Nunatsinni biathlonertartut kattuffiat, Grønlands Biathlon Forbund, tusagassiutinut taama nalunaarpoq.
Norskit sisoraaserlutik ooqattaasartui isorartussutsini pingasuusuni, tassa 12,5 kilometerimi sisamariarluni ooqattaasarnertalimmi, 7,5 kilometerimi marloriarluni ooqattaasarnertalimmi taavalu iligiit sisamakkaarlutik kingoraartigiiaallutik tamarmik immikkut marloriarlutik ooqattaasarlutik 7,5 kilometererlutik pissartanngorniupput.
Norskit sisoraaserlutik ooqattaasartui Lillehammerimi OL-erfiusimasumi pissartanngorniupput.
- Norgemi pissartanngorniuteqataaninni angusakka naammagisimaaqaakka. Ujaminnannissara neriuutigisimavara, unamminernili pingasuusuni tamani ujaminnannissara ilimagiivinngikkaluarpara, Sondre Slettemark oqarpoq.
- Kingullertigut sungiusarlualaavippunga. Inuusuttulli Kazakhstanimi nunarsuarmi marsip sisamaaniit pissartanngorniunneranni peqataanissannut pissassarluarniarlunga sungiusartarnikka akuttorallassavakka. Peqataanissannut qilanaarpunga.
