Sri Lankami sukannersumik naalakkersuisoqalersoq - suli eqqissiviilliortoqartoq

Sri Lankami sukannersumik naalakkersuisoqarnissaa pingasunngornermi eqqunneqarpoq.

Præsidentip Gotabaya Ratapaksap qeqertaaqqanut Maldiverinut qimaareersorlu taama pisoqarpoq.

- Præsidentip Sri Lankamit qimaanerata kingorna politikkikkut aqutsisut suliaqarnissaat pissutigalugu sukannersumik naalakkersuisoqalerpoq, Sri Lankami ministeriunerup allaffianit oqaaseqartartoq, Dinouk Colombage oqarpoq..

Illoqarfiit pingaarnersaanni Colombomi innuttaasut piffissaligaanngitsumik angerlarsimaannaqquneqarput. Akerliussutsimik takutitsinerit eqqissiviilliornerillu killilersimaarniarlugit taama aalajangertoqarpoq.

Akerliussutsimik takutitsisut tusindilikkaat ministeriunerup, Ranil Wickremesinghesip allaffiata eqqaani katersuupput. Politiit akerliussutsimik takutitsisut sakkortusaartortaannut gassimik qulliliornartumik atuipput.

Præsidenti 73-inik ukiulik nulianilu paarsisunilu nunami tassani timmisartoqarfiit annersaannit pingasunngornermi ullaakkut aallarput.

Præsidentitut unnerluutigineqarsinnaanngikkallartilluni taamaaliornissani kissaatigisimagaa ilimagineqarpoq.

Colombomi sapaatit-akunnerini kingullerni akerliussutsimik takutitsinerit imaaginnavissimapput.

Præsidentip ministeriunerullu tunuarnissaat piumasaralugu inuit tuusintilikkaat aqqusinerni katersuuttarsimapput.

Sri Lankami aningaasarsiornerup ingerlanerliornera innuttaasut naammagittaalliuutigaat. Præsidenti matumani akisussaasuunerarpaat.

Sri Lankap inatsisartui juulip ulluisa 20-anni præsidentimik nutaamik toqqaassapput. Sri Lankami inatsisartut siulittaasuat ataasinngornermi taama paasissutissiivoq.

Sri Lanka Indiap kangimut kujasissortaata avataaniippoq, 22 millioninillu innuttaqarluni.