Tunumi avannaanilu Tusass teknikkikkut suli ajornartooqqavoq
Avannaani tunumilu attaveqaatit pitsaanngillat:
Avannaani tunumiluunniit najugaqarsimaguit oqarasuaatillu ajoqattaarpat taava oqarasuaatit ajoquteqanngilaq attaveqarnerliuna pitsaanngitsoq.
Tusass nalunaarpoq sumiiffinni taaneqartuni attaveqarniarneq ulluni makkunani suli pitsaanngitsoq.
Teknikerillu arlallit antennemik iluarsiiartortut Kullorsualiartinneqartut unnerlugit. Silali pitsaanngimmat sivitsoruttoortut aamma erseqqissaatigineqarpoq.
Siusinnerpaamillu sapaatiuppat aatsaat teknikerit antennemik iluarsiiartoqqissinnaasut Tusass allappoq.
Kullorsuarmiut Tusassimut pisisartut SMS-ikkut tamanna pillugu ilisimatinneqareersut Tusass allappoq.
Taamatuttaaq Upernavimmi tamatumalu eqqaaniittuni nunaqarfinni attaveqarniarneq aamma pitsaanngilaq, tamatumali nalaani ajoqutaa silap isugutanneranik kiatsittarneranik aammalu anorersuartarneranik peqquteqartoq oqaatigineqarpoq antennet tassaniittut qerruttarmata, naak aamma issittumiittussatut sanaajugaluarlutik, Tusass allappoq.
Taamatuttaaq tunumi satellitsip nunamiittorlu stationip akornanni internetsip attaveqarniarneranik arriilliortitsisoq oqaatigineqarpoq.
Tusassilli ajoqutit tamakku aaqqinneqarnissaat sulissutigigai erseqqissaatigineqarpoq. Qaquguli aaqqikkumaarnissaat pillugit Tusass oqaaseqartissinnaasimanngilarput.
