Steffen Johansen innaallagissap akitsornissaanut: 44 koruunit soorpasinngikkaluarput, kisianni...
Innaallagissamut akit kilowattimut 10 ørinik qaffanneqassapput. Imermut kubikmeterimut 1,20 koruuninut qaffanneqassallutik.
Nukissiorfiit oqarnerat naapertorlugu ilaqutariit sisamanik amerlassusillit innaallagiamut imermullu qaammammut 44 koruuninik akiliinerusalernissartik naatsorsuutigisinnaavaat.
Akit nutaat 2023-mi februaarip aallaqqaataani atuutilissapput.
Sisimiuni aqqusinermi naapitat isumaat KNR-ip tusarniaaffigai.
Abegael Skifte
Nukissiorfiit akinik qaffaaneq qanoq isumaqarfigaajuk?
- Uanga isumaqarpunga inuuniarneq akisoreertigisoq aamma akitsulerneri isumaqatiginngilara. Ingammik illuinnarmiilluni inissiamiigani imeq innaallagiarlu, Abigael Skifte oqarpoq.
Sooruna?
- Innaallagissamut atuingaatsiartarpugut panersaaveqaratta. Sipaarnerulerniartariaqassaagut.
Nukissiorfiit imeqarfimmut, pilersuinermilu atortunik iluarsaassinissaminnut kiisalu nukissiornermut atortunut allanut ukiuni tulliuttuni amerlasuuni aningaasaliingaatsiarnissartik akinik qaffaanermut pissutaasoq aamma nassuiaatigaat.
Qanoq isumaqarpit?
- Isumaqataanngilanga innuttaasunut tutsinneqarneranut. Nutarsaaniarunik allatut iliortariaqaraluarput, Abegael Skifte oqarpoq.
Steffen Johansen
Nukissiorfiit akinik qaffaaneq qanoq isumaqarfigaajuk?
Akit qaffaataat
Innaallagiap akia kilowattimut 10 ørenik akisunerulissaaq. Imerlu kubikmeterimut 1,20 koruunimik akisunerulissalluni.
Nukissiorfiit oqarnerat naapertorlugu ilaqutariit sisamanik amerlassusillit innaallagiamut imermullu qaammammut 44 koruunimik akiliinerusalernissartik naatsorsuutigisinnaavaat.
Akit nutaat 2023-mi februaarip aallaqqaataani atuutilissapput.
- Ilungersunarpoq. Taamatut najugaqartuulluni ingammik inissiani tamakkua taama akitsuisaqattaartigisut piffik kingulleq ukiut kingulliit inissiat annertoorujussuarmik akitsorneqaqattaaramik. Taava soorunami sunniuteqarami aamma imeq kiassarnerlu allallu akitsorneratigut soorunami ilaqutariippassuit eqqugaasussaapput. Taamaattumik ilungersunarpoq, ilungersunartorujussuuvoq.
Nukissiorfiit imeqarfimmut, pilersuinermilu atortunik iluarsaassinissaminnut kiisalu nukissiornermut atortunut allanut ukiuni tulliuttuni amerlasuuni aningaasaliingaatsiarnissartik akinik qaffaanermut pissutaasoq aamma nassuiaatigaat.
Qanoq isumaqarpit?
- Isumaqarpunga 44 koruumik taallugu annertugisassaanngikkaluartoq, kisianni ukiut siuliini qiviaraanni taakkua 44 koruuniinnaaneq ajoramik, ukiut siuliini akitsuisareernerit allallu aamma ineqarnermut tunngasut. Kiassarneq imerlu kisimik eqqarsaatiginngikkaluarlugit inissiat, soorlu assersuutigalugu Qeqqata Kommunia eqqarsaatigigaanni 2 %-imik ukiut tamaasa qaffaasarput inissiat akiinut. 2%-iinnaq imaluunniit 44 koruuniinnaq taakkua sorujussuanngortarpoq ilaqutariit pissakinnerusut eqqarsaatigigaanni taakku, Steffen Johansen oqarpoq.
Jakob Ludvigsen
Nukissiorfiit akinik qaffaaneq qanoq isumaqarfigaajuk?
- Isumaqarpunga ataatsimut isigalugu ajoriinnagassaanngitsoq. Annertuginanngilaq. Aamma isumaqarama piffissami sivisuallaartumi akit nikissimannginnamik.
