Steffen Knulst Arctic sportsimi timersortartoq top 5-ip akornanniikkusuttoq
Arctic Winter Games sapaatip akunnerata tulliata naanerani ammaanersiorneqassaaq.
Inuit pinnguaataannik unammisartoq Arctic Winter Gamesimut peqataasussaq Steffen Knulst, medaljenik angerlaasserusuttoq KNR-imit naapipparput.
Nuummeersup 27-nik ukiullip Steffen Knulstip inuit pinnguaataannik unammisartup, Arctic Winter Gamesimi ukioq manna ujaminnannissani neriuutigaa.
- Arlaat aamma bronzeusinnaavoq, tamaasa nuannaarutigisinnaavakka, Steffen Knulst oqarpoq.
Arctic Winter Games kingullermik 2018-imi ingerlanneqarpoq. Covid-19 peqqutaalluni taamaatiinnarneqarluni.
Arctic Winter Games ukioq manna Canadap nunap immikkoortortaani Wood Buffalomi ingerlanneqassaaq.
Timersortartut peqataasussat 67-iupput.
Kalaallit timersuutini Arctic Sportsimi, Dene Gamesimi, Volleyboldimi, Sulorarnermi, nerrivimmi arsaararnermi kiisalu snowboardimi ukioq manna peqataassapput.
Arctic Winter Gamesimi nunat uku aamma peqataassapput Alaska, Alberta Northimit, Northwest Territoriesimit, Nunavik-Quebecimit, Nunavummit, Saamit nunaannit, Yukonimiillu.
Arctic Winter Games coronavirus pissutigalugu ukiut tallimangajaat aaqqissuunneqanngereerluni januaarip 29-ani aaqqissuunneqaqqittussanngorpoq.
Canadami nunap immikkoortuani Albertami Wood Buffalomi Issittormiut unammiuaarnerat ukioq manna ingerlanneqassaaq, Timersoqatigiit Kattuffianiillu tamanna qilanaarutigineqarpoq.
- Timersornermik aaqqissuussinerinnaanani aamma kulturikkut aaqqissuussaavoq annertooq. Timersortartut, sungiusaasut aqutsisullu amerlasuut ukiuni arlalinni ilaanikuupput, taamaammat takoqqittussarpassuupput, Aviaaja Geisler oqarpoq.
Timersortartut peqataasussat ukioq manna ukiut siuliinut sanilliullugu ikinnerussapput, tassami 67-it missaannaanniittut timersuutini assigiinngitsuni arfinilinni peqataassapput.
Kalaallit timersuutini Arctic Sportsimi, Dene Gamesimi, Volleyboldimi, Sulorarnermi, nerrivimmi arsaararnermi kiisalu snowboardimi ukioq manna peqataassapput.
Misigisaq immikkuullarissoq
Arctic Sportsimilu unammeqataasussaq Steffen Knulst, ukiut tallimat matuma siorna unammeqataareernikuusoq, ukioq manna isumalluarpoq.
- Tassa headpull-imi aamma ilimanarpoq medaljennassinnaassallunga, kingullermik ajortorujussuullunga unammiaqataanikuugama taava ukioq manna sungiusarluarnikuujusallunga unammiassaanga, Steffen Knulst oqarpoq.
AAMMA ATUARUK Nunarput Arctic Winter Gamesimi ujaminnannissaanut neriuutissaqarluartoq
Steffen Knulst nunatsinni Arctic sportsimi unammissutsini one foot highkick-imi two foot highkickimilu rekordileereernikuuvoq. Arctic Winter Gamesimilu unammissutini taakkunani ukioq manna pikkorinnerit ilaanniikkusuppoq.
- Apeqqutaaginnarpoq AWG-imut kikkut ilaassanersut, kisianni top 5-ip iluaniissinnaassallunga naatsorsuutigaara, Steffen Knulst oqarpoq.
Taanna kingullermik 2018-imi Arctic Winter Gameseqataavoq, Issittormiullu unammiuaaraangata misigisaq immikkuullarissuusartoq oqaatigaa.
- Nunaniit allaneersut pitsaanerpaat tassani ilaasussaagamik, Steffen Knulst oqarpoq.
Nunatsinniillu Arctic Winter Gamesimut unammiartut ujamminik nunatsinnut angerlaassisinnaanerat Timersoqatigiit Kattuffiannit neriulluarfigineqarpoq.
- Nunatsinni Arctic Winter Gamesimut aallartitat ujaminnannissaat neriulluarnarpoq, Aviaaja Geisler oqarpoq.
