Suliumajunnaartoqannginnera pillugu: Annakkuummernarpoq qujanarlunilu
Poorskip nalaa nunatsinnni timersorfiusaqaaq.
Taamaattumillu piffissap taamaalinera angallaffiusaqaluni.
Ukioq mannali angallannerup nalorninartorsiorfiuleraluarnera pillugu Arctic Sounds festivalimut volleyballimilu peqataanissamut qilanaarneq killeqarsimagaluarpoq, inuimmi apuussinnaanerlutik nalornissutigimmassuk.
Ernumassutillu tamakku ippassaq kiisami nuannersumik inissinneqarput.
AAMMA ATUARUK Suliumajunnaartoqassanngilaq: Air Greenland flymekanikerillu isumaqatigiipput
Timmisartuussinerimmi arlalippassuit kinguaattooratarsinnaanerigalui pinngitsoorpoq, Dansk Metal Air Greenlandilu nutaamik isumaqatigiissusiormata suliumajunnaaqqajaanerugaluarlu taamaalilluni pinngitsoorluni.
KNR aqqusinermi angalaarpoq inuillu naapitat qanoq isumaqarnersut paasiniarpai.
Timersornissaq annaanneqarpoq
Angerla Poulsenip isumaqatigiittoqanera nuannaarutigivaa:
- Poorskikkut nalaanni angallattunut ilaasussaagama, timersortunut nakkutiginnikkiartortunut ilaallunga, assut nangaanartorsiuleraluarpunga , taamaattumik isumaqagiissuteqartoqarnera iluaraara, Angerla Poulsen oqarpoq.
Salomon Jensen timersoriarlutik angalasussanut qutsassivoq:
- Qujanarpoq, angalasussarpassuit eqqarsaatigalugit. Tassami poorskikkunni timersortunik isiginnaassalluta sungiusimavarput, qutsannaqaat, Salomon Jensen oqarpoq.
Angerla Poulsen
Tasiilamut angerlalaarsinnaanngorpugut
Inatsisartuni ilaasortaq Harald Bianco IA, Tasiilami najuqarpoq, Inatsisartulli upernaakkut ataatsimiinneranni Nuummiippoq.
Tallimanngorpat Inatsisartut upernaakkut ataatsimiinnerat naggataartussaavoq, Harald Biancollu angerlalaarsinnaanngornini qilaaraa:
Harald Bianco
- Annakkuummernarpoq, poorskimi angerlalaartussaagatta imaallaat periarfissinneqarpugut, illorput allallu pigisagut Inatsisartuni ataatsimeeqataatillunga sivisuumik qimaqqasarpagut, taamaattumik alakkalaarsinnaalerneri qujanarpoq.
Isumaqatigiissutip qanoq imaqarnera suli ilisimaneqanngilaq, illuatungeriilli tamarmik isumaqatigiissuteqarnertik angusaqarluarumaarnissartillu nuannaarutiginerarpaat
