Sullivinnik Nakkutilliisoqarfik 30-nik inerteqquteqarlunilu 70-ingajannik erngertumik peqqussuteqartoq

Nunatsinni suliffimmi ajutoornerup kingunerisaanik siorna toqusut pingasuupput.

Angut 60-inik ukiulik Nuummi sulitilluni ikorfanit nakkarnermini ajunaarpoq. Aggustimi aamma taama pisoqaqqippoq – septembarimilu angut 64-inik ukiulik Usisaatip quersuarmi majuartaammit nakkarnermini aamma ajunaarpoq.

Taamaammat Kalaallit Nunaanni Sullivinnik Nakkutilliisoqarfik 85-eriarluni siorna nakkutilliivoq: Nuummi, Ilulissani Sisimiunilu nakkutilliiartorluni tikeraarpoq.

Sullivinnik Nakkutilliisoqarfik tusagassiuutinut nalunaarummik nammineq nalunaaruteqarpoq.

Suliniuteqartoqarnissaa pisariaqartoq

Sanaartorfiit, quersuit amerlasuunngorlugillu nioqquteqartarfiit aamma pulaarneqarput.

Malitserpassuaqarpullu: 30-t missaannik inerteqquteqartoqarlunilu 70-it missaannik erngertumik peqqussuteqartoqartoq, Sullivinnik Nakkutilliisoqarfik paasissutissiivoq.

- Immikkut ittumik ajutoortoqannginnissaanut immikkut ittumik suliniuteqartoqartariaqartoq qisuariaatit amerlassusaasa ersarilluinnartumik takutippaat, Sullivinnik Nakkutilliisoqarfimmi immikkoortumi pisortaq, Casper Kronow, oqarpoq.

- 2022-p ingerlanerani portusuumit nakkarnerit annertuumik ajutoorfiusut arlallit takuagut – ajoraluartumillu ilai toqumik kinguneqarput.

- Portusuumit nakkarneq annertuumik ajoqusernermik kinguneqarsinnaavoq - ajornerpaamillu toqumik kinguneqarsinnaalluni. Majuartarfinni, ikaani kiisalu illup qalianiinnermi ajutoornissaq aarlerinarsinnaavoq. Taamaammat sulinerup pilersaarusiornissaa aaqqissuunnissaalu pingaaruteqarpoq, taamaalilluni portusuumit nakkortoqarnissaa aalerinaateqassanani, Casper Kronow oqarpoq.

Sulisitsisup sulinerup qanoq ingerlanissaanik ilitsersuussinissaq akisussaaffigaa. Aamma ajutoortoqannginnissaa pissutigalugu ilitsersuutit malinneqarnissaasa nakkutiginissaat sulisitsisup akisussaaffigaa.

Nakkutilliinermik suliaqarneq Danmarkimi Sullivinnik Nakkutilliisoqarfik suleqatigalugu ingerlanneqarpoq.

Pingaartumik Aaja Chemnitz Larsen (IA) Nunatsinni Sullivinnik Nakkutilliisoqarfik isornartorsiornikuuaa.

Nakkutilliisoqarfik nunatsinnit tiguneqarnikuunngilaq – taamaammat Danmark akisussaasuulluni. Nunatsinnilu nakkutilliisoqarfik aningaasanik amigaateqartoq, taamaalillunilu sullivinnik naammattumik nakkutilliisoqartanngitsoq IA-meersup oqaatiginikuuaa.