Nunatsinni dronet atorlugit nakorsaatinik nunaqarfiliaassisoqartalissasoq
Nunatsinni illoqarfiit nunaqarfiillu akornanni isorartussutsit eqqarsaatigalugit assersuutigalugu nakorsaatinik pilersuiniarneq ajornakusoorsinnaavoq. Timmisartuaqqanilli ungasianit aqunneqarsinnaasunik, tassa dronenik atuinerup tamanna oqilisaavigisinnaassagunarpaa.
Danmarkimi suliffeqarfiup Falckip Kalaallit Nunaanni peqqinnissaqarfik suleqatigalugu suliarissavaa.
- Peqqinnissaqarfiup dronet atorlugit nunaqarfinnik qanoq isilluni pitsaanerusumik sullissisinnaanera suliniut una aqqutigalugu paasiniarneqassaaq, nunaqarfinnummi aqqutit ilaatigut ajornakusoorsinnaapput, napparsimmavimmut qaninnermut ilaatigut ungasissinnaagami, Falck sinnerlugu ineriartortitsinermi pisortaq suliniummullu akisussaasuusoq Søren Søndergaard Laugesen oqarpoq.
AAMMA ATUARUK Demokraatit 800 millioninut nutarterinissamut: Suliassat aallartinniarsigit
Suliniut aallarniutigalugu ukioq manna novembarip tungaanut ingerlasussatut siunniunneqarpoq.
Dronet atorlugit nakorsaatinik pilersuisoqassaaq, nappaammullu suussusersiornermi misissuinerit napparsimmavimmut napparsimmmavimmiillu aallaqqaammut tunniunneqartassallutik.
Napparsimasut peqqinnissaqarfimmit sullinneqarnerisa suliniut una aqqutigalugu pitsanngorsarneqarsinnaanissaa neriuutavoq.
- Napparsimasut nunaqarfinniittut nakorsaatinik, nappaammullu suussusersiuinermi inernernik pilertornerusumik pilersorneqarsinnaanissaat neriuutigaarput, assersuutigalugu immaqa napparsimmaviliaassisoqartariaqassanngilaq, Søren Sødergaard Laugesen nutaarsiassaqartitsivimmut Ritzauimut oqarpoq.
