Taamaammat amerikamiut franskillu sinerissami alapernaarsuisui Nuummiittut
Nunani allamiut sakkutuuisa umiarsuaasa Nuup eqqaaniinnerat eqqarsaatigisimagukku tamanna uani akissutersisinnaavat.
Issittumi Sakkutooqarfik USA Frankrigillu aamma peqataaffigisaanni ”Exercise Argus”-imik taaguuteqartumik sapaatip akunnerani matumani annertuumik sungiusaleruttorpoq.
Annaassiniarnerni, search and rescue-imik suliaqarnermik taaneqartuni piginnaasaqarnerulernissaq avatangiisinilu mingutsitsisoqaratarsinnaanerani suliaqarnissamut piginnaasaqarnerulernissaq siunertaapput.
Taamaammat USA suliassanut taakkorluinnarnut immikkut ittumik ilisimasartunik tapertaavoq. Tamanna Issittumi Sakkutooqarfiup tusagassiuutinut nalunaartartua, Camilla Schouw Broholm oqarpoq.
- Inunnik eqimattanik maanngartitsipput, taamaalilluta immitsinnut ilinniarlutalu arlaannik pisoqassagaluarpat suleqatigiinnissamut pitsaanerulersinnaavugut, taanna oqarpoq.
Assimi amerikamiut umiarsuaat "Oak" Issittumi Sakkutooqarfiup umiarsuaa alapernaarsuut, Ejnar Mikkelsen aamma Air Greenlandimit qulimiguulik peqatigalugit sungiusartoq takuneqarsinnaavoq. Assi: Petty Officer 2nd Class Diana Sherbs, U.S. Coast Guard
Amerikamiut franskillu sineriammi alapernaarsuisuisa kiisalu Issittumi Sakkutooqarfimmit umiarsuaq alapernaarsuutip saniatigut Air Greenlandimit qulimiguullit marluk aamma peqataapput.
Tamatuma saniatigut Sisimiuni politiit angallataat sakkutuut umiarsuaanni taakkunani pingasuni inuttat Sisimiuni sapaatip akunnerata matuma aallartinnerani assingusumik sungiusareersut Nuummukaqataavoq.
USA: Suleqatigiissinnaanerput isumannaannermut tunngaviuvoq
Amerikamiut sineriammik alapernaarsuisa issittumi avatangiisitigut sapinngisamik patajaatsoqarnissaa pillugu suleqatigiissinnaanissaq tunngavigilluinnarpaa.
- Issittup isumannaatsuunissaa avatangiisitigullu patajaatsuunissaata qulakkeernissaa pinngitsoornagu uagut anguniagaraarput. Tamanna anguniarparput tamatumalu angunissaanut suleqatigiinnissaq kisimi periarfissaavoq, amerikamiut sineriammi alapernaarsuisuisa issittumut tunngatillugu tusagassiuutinut nalunaaruteqartartuat, Daniel A. Schrader oqarpoq.
Suleqatigiinneq taamaattoq assersuutigalugu umiarsuarmik takornariartaatimik ajunaalertoqaraluarpat, amerlasuunillu qimagussuisoqarlunilu uuliamik aniatitsisoqaraluarpat pingaaruteqarluinnassaaq, taanna nassuiaavoq.
Issittumi Sakkutooqarfimmiillu Camilla Schouwip isumaqatigilluinnarpaa.
- Issittumi Sakkutooqarfimmiit maaniippugut, kisianni suleqatigisatsinnik ikiorneqarnissamik pisariaqartitsissaagut.
Ukiumoortumik sungiusarneq
”Exercise Arhus” tunngaviusumik ukiumoortumik sungiusarneruvoq, kisianni tamanna pinerit tamaasa nunat sorliit peqataanissaat nikerarsinnaasarpoq.
- Inuiaqatigiit taakku assingi sungiusarnernut ataasiakkaanut ukiut tamaasa peqataanissaat qulakkeerneqarsinnaanngilaq. Nunat ataasiakkaat pingaarnersiuineranni kikkunnik piginnaasanillu qanoq ittunik aallartitserusunnerat apeqqutaasarpoq.
Amerikamiut sineriammi alapernaarsuutaat, USCGC Oak Sisimiuneereerluni maanna Nuummi Issittumi Sakkutooqarfimmeersut franskillu sineriammi alapernaarsuutaanersut sungiusaqartigai. Assi: Petty Officer 2nd Class Diana Sherbs, U.S. Coast Guard
Tamanna amerikamiut franskillu tungaanniit ukioq manna pingaarnersiorneqarpoq.
Nuup eqqaani sungiusarnerit arfininngorneq ilanngullugu ingerlanneqassapput.
