Taiwanimi naalakkersuisut: Kinamiut dronerigigunagaannik aallaanninnerput eqqortuuvoq
Timmisartuaraq ungasianiit aquttagaq sakkutuunit pigineqanngitsoq, qeqertaq Tawainip nakkutigisaa qulangerlugu Kinamilu illoqarfiup Xiamenip qanittuatigoortoq Taiwanip sakkutuuinit aallaaneqarpoq. Aallaaneqarnissaanik aalajangerneq eqqortuusoq, Taiwanimi naalakkersuisut oqarput.
Taiwanimi sakkutuut timmisartuaqqamik ungasianiit aquttakkamik kikkunnillu pigineqarnersoq ilisimaneqanngitsumik aatsaat aallaannipput.
Taiwanimi ministeriunerup Su Tseng-changip oqarnera naapertorlugu Kina Taiwanip killeqarfiinik qaangiisarnera pillugu arlaleriarujussuarlugu mianersoqqusarsimavaa.
Kinami nunanut allanut tunngasunut ministereqarfimmit oqaatigineqartoq naapertorlugu Taiwanimi naalakkersuisut Kinamut kamassaariniarsaripput.
AAMMA ATUARUK Kinap USA Taiwanimik niueqateqarniarunnaaqqugaa
Kina timmisartunik Taiwanip nakkutigisaanut qeqertanut Kinmeninut qanillattortarsimanera pillugu Taiwanimit arlaleriarluni isornartorsiorneqartarpoq.
Kinamiut timmisartuaaraannut ungaasianiit aquttakkamut mianersoqqussummik Taiwanimiut sakkutuui siullermeerlutik marlunngornermi eqqaassipput.
Kinamiut timmisartuaraat ungasianiit aquttakkat Taiwanip qanittuatigoortut videoliarineqarneri marluk Kinami inuit attaveqatigiittarfiini maanna takuneqarsinnaapput.
Videoliani taakkunani taiwanimiut sakkutuui timmisartuaqqanut ungasianiit aquttakkanut ujaqqanik milloortut takuneqarsinnaapput.
