Takornarianik angallassisut nunatsinneersuunissaat pingaaruteqarpoq

Umiarsuit takornariartaatit coronap ukiuni marlunni kingullerni tuniluunnerani tikittarsimanngitsut maanna tikeraqqipput. 

Corona sioqqullugu tikittartut amerlassusaannut sanilliullutik amerlanerulerlutik tikerarput. Kialaannguup ataani ukaliusaat teqqalasut akornanni unnuami qaamasumi nunatsinni misigisassarsiorneq pilerigineqaqaaq. Umiarsuit takornariartaatit 52-it taakkunanilu ilaasut 20.000-t 22.000-llu akornanni amerlassusillit Nuummut aasaq manna tikissasut, Sikuki Nuuk Harbourip naatsorsuutigaa. Tikittussat coronap tunillaassuutilinnginnerani tikissimasuninngarnit amerlanerungaatsiarput. Takornariartaassuit 2017-ip 2019-illu akornanni tikittut 34-t 36-llu akornanniipput.

Amerlanerit aamma Ilulissanut tikissapput, tassami umiarsuit takornariartaatit 62-it 20.000-nit ikinnerunngitsunik ilaasullit tikinnissaat naatsorsuutigineqartoq, Visit Greenlandip nittartagaani atuarneqarsinnaavoq. 

Linda Hegelund Nuummi takornarianik angallassisussaq angallassisussat ikittuinnaat ilagaat.

Takornarianik tuusintilikkaanik angallassisinnaasunik nunatsinneersunik pissarsiniarneq ajornakusoortoq, umiarsuarni takornariartaatini ilaasunik angallassivimmik Greenland Cruisesimik piginnittoq Ivik Knudsen-Ostermann oqarpoq. 

Tamanna takornarianik angallassisartut coronap nalaani suliassaqarsimannginnerata kinguneraa.

- Takornarianik angallassisartut ukiuni kingullerni marlunni inuunertik allatut ingerlateqqippaat allanillu suliaqalerlutik, taamaammat nunatsinneersunik angallassisussarsiornerput ulapputigaarput, Ivik Knudsen-Ostermann oqarpoq.

AAMMA ATUARUK Umiarsuit takornariartaatit tulattussat aatsaat taama amerlatigisut

Linda Hegelundip Greenland Cruisesimik Inuk Travelimillu sullissisartup tamanna ilisarilluarpaa. Taanna ukiuni kingullerni qulini takornarianik angallasisartutut sulivoq, aasarlu manna immikkuullarissumik ulapinnarnera oqaluttuaraa. 

- Takornarianik angallassisinnaasunik amigaateqarneq takornartaanngilaq. Angallassiartut amerlanerit suliffimmi imaluunniit ilinniarnermi saniatigut angallassisarput. Taamaammat sulisitsisut angallassisinnaasunik pissarsiniarnerat ajornakusoorpoq, Linda Hegelund sapaatit akunnerata naanerani angallissinissarpassuarnik pilersaaruteqartoq oqarpoq. 

Nunatsinneersut nunatsinnik ilisimasaqarnerusut

Nunanit allaneersunik amerlanerusunik sulilersitsinissaq aaqqiissutaasinnaagaluarpoq. Nunatsinneersulli takornarianut nunatsinnik nittarsaassinissaat pingaaruteqartoq, Ivik Knudsen-Ostermann Linda Hegelundilu isumaqarput. 

- Angallassisartut nunatsinneersut nunatsinni ulluinnarni inuuneq kultuurilu pillugit ilisimasaqarnerupput, tamakkuuppullu takornarianit apersuutigineqartartut, Linda Hegelund oqarpoq.  

Takornariat Linda Hegelundip piginnaasaanik kisimik atuisanngillat. Linda Hegelundimi angallasinermini atorsinnaasaminik aamma isumassarsisarpoq.

- Nunarput kusanartupilussuuvoq. Angallassilluni allatut isiginartarpoq, taakkulu alutorsarnerat sunnertinnartaqaaq, taamaammat angallassineq pissanganartuaannarpoq, Linda Hegelund oqarpoq. 

Linda Hegelund immikkuullarissutut isigisaminik nittarsaakkusutaqarpoq: 

- Ilulissat. Illoqarfik ileqqutoqqanik kultuurimillu nutaamik peqarpoq. Kangerlualu immikkuullarilluinnarluni, taanna oqarpoq.