Tarnip pissusianik ilisimasallip Upernavimmi utoqqaat illuat isornartorsioraa

Upernavimmi utoqqaat illuanni najugalinni kaassuartakkanik atuisut arfinillit ilaat ukiuni marlunngulersuni ineeqqaminni kisimiillutik nerisarput.

Nerisarfimmukassagunimmi elevatorikkooqqaartariaqarput, elevatorili ukiuni marlunngortuni atorsinnaanngilaq. Nerisarfimmi taakkua torsuusaanniinngilaq, elevatorilu ajorluni.

- Tamanna utoqqarnut kingunerluuteqangaatsiarsimasinnaavoq, tarnip pissusianik ilisimasalik, Else Poulsen KNR-imut oqarpoq.

- Pisariaqartitsinerlu aallaavigalugu timikkut, tarnikkut anersaakkullu sunniuteqartarpoq soorunami. Inuit ilaasa mattunneqarneq ajorineq ajorpaat aamma kisimiinneq. Kisianni inuit ilaasa inuiaqatigiinni peqataanissaq pisariaqartittarpaat.

- Taama sivisutigisumik inuit mattunneqaraangamik soriarsinnaanerat killeqalersarpoq. Sinissinnaajunnaarsinnaasarput, Else Poulsen KNR-imut oqarpoq.

Kingoraartissaq Italiami nassaarineqartoq

Upernavimmi utoqqaat illuanni elevatori ajoquteqarmat ukiuni marlunni atorsinnaanngitsoq, KNR-imit sapaatit akunnerata siuliani oqaluttuaraarput. Elevatori pisoqaavoq kingoraartissaanilu nassaarniarneq ajornakusoorluni. Maannali kingoraartissaanik Italiami nassaartoqarpoq – oktobarillu qiteqqunnerani Upernavimmut suliariartorneqarnissaa pilersaarutaavoq.

AAMMA ATUARUK Jenny Hansens mor har været udenfor alderdomshjemmet to gange på to år

Upernavimmi utoqqaat illuanni najugallit katillutik 19-iupput, taakkunannga arfinillit kaassuartakkanik atuisuupput. Taakku quleriinni pingasuusuni qullerpaami najugaqarput.

Taakku arfinillit ukiuni marlunni sinittarfimminniit iluamik aninikuunngillat.

Taakku illumiit aniniarpata, inini quleriinni pingasuusuni qullerpaamiit inunnik sisamanik akiarneqarlutik majuartarfikkut aqqunneqaqqaassapput. Sinittarfimminnullu uterniarunik aamma taamatut majuunneqassallutik.

Sammisanut aamma akuutinneqarneq ajortut

Utoqqaat illersuisuat, Inga Egede Upernavimmi utoqqaat illuannut maajip qaammataani tikeraarpoq.

Angalanermini nalunaarusiaa maanna naammassineqangajalersoq KNR-imiit pissarsiaraarput.

Taassuma najugalinnit arlalinnit naammagittaalliuutinik apuussivigineqarnermi kingunerisaanik Upernaviliarsimanera nalunaarusiaani allaqqavoq.

Illersuisup nalunaarusiaani Upernavimmi utoqqaat angerlarsimaffianni elevatorip ukiuni marlunngulersuni ajornerani utoqqarnut kingunerluutit allanneqarput.

Pineqartut arfinillit nereqataasannginnermi saniatigut aamma najugaqartut allat isersimaartarfimmi ataatsimuualaaraangata aamma peqataatinneqarneq ajorput.

AAMMA ATUARUK Ældretalsmand: Plejehjemsbeboerne i Upernavik er i livsfare

Najugaqarfiammi ikuallalissagaluarpat qanoq iliortoqassava? Tamanna utoqqaat oqaaseqartartuata akissutissarsiuminaatsilaarpaa, ikuallattoqassagaluarpammi utoqqaat kaassuartakkanik atuisut arfinillit qanoq sukkatigisumik majuartarfikkut aqqussuunneqarsinnaanersut nalornissutigaa.

- Massakkutut inissisimasoqartillugu inuit utoqqaat kaassuartakkani issiasut inuunerisa ulorianartorsiortinneqarnerat sivisuallaalerpoq, massakkut iliuuseqartoqartariaqarpoq, Utoqqaat illersuisuat, Inga Egede KNR-imut oqarpoq.

- Utaqqeqqissanngillat. Tuaviornerpaamik elevatori taanna aaqqeqqissinnaanngippat utoqqaat taakku allanut inissinneqartariaqarput, aneriataarnissamut periarfissalerlugit. Taavalu immaqa pisinnaanerusut allatut ajornartumik paarlaallugit qulaanut nuutsinneqartariaqarlutik, taanna oqarpoq.

Upernavimmi utoqqaat illuanni aqutsisut KNR-imiit oqaaseqartinniarsarigaluarpagut. Taakkuli Avannaata Kommuniani borgmesterimut innersuussipput.

- Qulakkeerniarlugu tamakku suliat suleriutsillu misissortippagut, Avannaata Kommuniani borgmesteri, Palle Jerimiassen oqarpoq.