Tasiilami nukappiaraq biilinik aporneqarluni ajoqusertoq
Nukappiara marlunnik ukiulik ippassaq ulloqeqqanngitsiartoq Tasiilami biilinik aporneqarpoq. Taanna Islandip napparsimmavianut aallarunneqarpoq, ajunngitsorli politiit ilisimatitsipput.
Nukappiaraq biilinik aportittoq Islandimut aallarunneqarpoq, ajunngitsorli politiit oqaatigaat.
Allattoq Marie Kûitse Kristensen
juunip 16-at 2022 14:15
Nukappiaraq marlunnik ukiulik Tasiilami ippassaq ulloqeqqalersoq biilinik aportilluni ajoquserpoq.
Nukappiaraq aportinnermi kingunerisaanik napparsimmavimmi suliaritittariaqalerpoq.
Tasiilamili napparsimmavimmi suliarineqarsinnaanngimmat Islandip napparsimmavianut aallarunneqartoq, Tasiilami politikommisæri, Aqqalu Petersen KNR-imut oqarpoq.
- Nukappiaraq ajunngilaq kisiannili suliaritittariaqarami maanilu suliarineqarsinnaanngimmat, ippassaq Islandimut aallarunneqarpoq, Aqqalu Petersen oqarpoq.
- Itinerusumik oqaaseqarsinnaanngilanga pisumut tunngatillugu, massakkut misissuineq suli ingerlanneqarami.
Nukappiaraq inuunerminik ulorianartorsiunngitsoq, ajunngitsorlu, politiit ilanngullugu ilisimatitsissutigaa.
