Tasiilami siorna eqqissiviilliortoqarpoq - ukiormanna taamaattoqaqqissanngilaq
Aggustip naanera septembarillu aallartinnera nunatta politiivisa ulapaarfigikkajuppaat.
Tasiilami siorna taamaalinerani imminut toqunnerit, pinngitsaaliinerit, aqqusinermi perulluliornerit erngunnerillu tamaani politiinut peqqissaavimmullu artukkiingaatsiarput.
Tasiilarmiullu meerartaat pisuni taama sakkortutigisuni aamma akuusarnerat, KNR-imiit allaaseringaatsiartareerparput.Taamaattoqaqqinnissaali ingalassimaniarlugu kommuni assigiinngitsorpaalunnik innuttaasunut tamanut ulluni makkunani pikialaartitsivoq.
AAMMA ATUARUK Tasiilami akissarsiffiup utertoornerullu kingorna ajornartorsiuterpassuit
Kommuneqarfik Sermersuup Tasiilami immikkoortortaqarfiani aaqqissuussinermi ataqatigiissaarisut aqutsisuat, Arkalo Skifte, taama oqarpoq.
- Sammisassat meeqqat atuareerneranni aallartittarput unnuallu tungaanut pisarlutik. Aaqqissuussarpaaluit ataatsikkut pisarmata innuttaasut soqutigisaminnut namminneerlutik ornigutiinnartassapput.
Tasiilami susassaqartitsinerit timersortarfimmi, katersortarfimmi, inuusuttut illuanni, fritidsklubbemi silamilu pisarput.
Ikiortariaqarpit?
Imminut toqunnissamik eqqarsaateqaruit kisimiittutulluunniit misigiguit Tusaanngamut 801180-imut sianerlutit 1899-imulluunniit sms-erlutit saaffiginnissinnaavutit.
Tusaanngamut sianerneq sms-ernerluunniit akeqanngilaq, kinaanerlu taasariaqarani.
Tusaannga pillugu uani paasisaqarnerusinnaavutit.
- Politiit inuusuttut isersimaartarfianni aamma nereqatiserineqarput inuusuttullu kaagiliornermik tamatuma kingorna aamma unammipput, Arkalo Skifte oqarpoq.
Aaqqissuussinerpaaluit assigiinngitsut ippassaq pingasunngornermi aallartittut arfininngornerup unnuaa ilanngullugu pissapput.
Kikkulluunniit pinaveersaartitseqataassasut
Tasiilaq imaannaanngitsunik siorna misigisaqarfiuvoq: Aggustimmi 30-ata septembarillu pingajuata akornanni imminut toquttut marluupput, imminut toqunnissamik eqqarsaatillit sisamaapput, pinngitsaaliilluni atoqateqartoqarpoq, suliat nakuusernermut tunngasut arfiniliupput angerlarsimaffimmilu eqqissiviilliornerit 15-iullutik.
Taamaattoqaqqinnissaalu pinaveersaartinniarlugu Kommuneqarfik Sermersuup Tasiilami immikkoortortaqarfia pikialaartitsivoq.
- Kommuneqarfik Sermersuup ataani uagut sunngiffimmi sammisassaqartitsinermi aaqqissuussisarpugut. Uani aaqqissuussinermi pioreersut amerlasuut atuupput. Assersuutigalugu timersortarfik, katersortarfik, inuusuttut isersimaartarfiat taakku atorlugit pinaveersaartitsivugut, Arkalo Skifte oqarpoq.
Timersortarfimmi inuusuttunut inersimasunullu timersuutinik unammisitsinerit, katersortarfimmi meeqqanut filmertitsinerit, playstationertitsinerit aaqqissuussinerillu allat illoqarfiup qeqqani pisassapput.
Taamaattoqaqqinnissaanillu pinaveersaartitsineq kommunip kisimiilluni kivissinnaanngikkaa, Kommuneqarfik Sermersuup Tasiilami immikkoortortaqarfiata pisortaa Hjørdis Vibergip oqaatigaa.
- Kommunip kisimiilluni tamanna kivissinnaanngilaa, illoqarfitsinni inuunerinnerulernissaq anguniarlugu innuttaasutut tamattaalluta ataatsimoortariaqarpugut.
AAMMA ATUARUK Narsíngátak atsiornernik katersiniartoq: Imigassat aalakoornartortallit matuneqaqqinnissaanik
Tasiilami pisiniarfiit imerniartarfiillu siorna septembarip pingajuaniit 17-iat ilanngullugu imigassaarniaqqusaajunnaarput.
Tamannali aaqqiissutissaanngitsoq, Hjørdis Viberg oqarpoq.
- Matusinerup uagutsinnut aqqutissaannginnera innuttaasullu oqaloqatigiissutigaarput, imigassamillu matusinata innuttaasunut periarfissanik allanik neqerooruteqartariaqarnerput eqqartorlugu, taanna oqarpoq.
