Thomas Dalager Ukkusissani inunnik pingasunik ikuallattumit annaassivoq

Ukkusissarmiu Thomas Dalager siorna juunimi sapiitsuliorluni aappariit, taakkulu ernutaata inuunerannik annaassivoq. Taamaaliorsimaninilu politiinit tallimanngornermi akissarsitinneqaatigaa.

Politiit paasissutissiinerat naapertorlugu Thomas Dalager ikuallattumut iserluni sapiitsuliorluni - aappariit taakkulu ernutaat illuni quleriinni siullermiit ikuallattumiit igalaakkut qimagutsippai.

Ukkusissani siorna juunip ulluisa 18-ianni illup ikuallannerani inuit pingasut ajunaarput inuillu pingasut ikuallattumit qimagutsinneqarlutik.

Thomas Dalager juunip 18-iani unnuami ikuallattoqarnerani iterpoq. Piaarnerpaamillu orniguppoq, inersumasut marluk aappariit taakkulu ernutaat arfinilinnik ukiulik ajoqusersimasut ikuallattumiit qimagutsippai.

AAMMA ATUARUK Ukkusissani ikuallattoqarnerani pumpit aappaata orsussaa imertanissimasoq

Thomas Dalager inunnik annaassisimanini pillugu politiinit tallimanngornermi akissarsitinneqarpoq.

Aappariit taakkulu ernutaat Nuummut aallarunneqarput pujormik najuussuisimanerannut ajoqusersimanerannullu misissortikkiartorlutik.

Ikuallanneq aallartimmai inuit katillugit arfinillit isersimapput.

AAMMA ATUARUK Politiit: Ukkusissani ikuallattoqarmat pinerluttoqarsimarpasinngilaq

Ukkusissani ikuallattoqarnerani imermut pumpit marluk atorsinnaanngillat. Taamaammallu ikuallattoq qamisarniarlugu Nukissiorfiit tankiat atorlugu qamisaasoqarpoq.

Ukkusissani innuttaasut dunkinik siparninillu atortulerlutik qamisaanermik ikiuupput.

Pumpit marluk ajoquteqartut Avannaata Kommuniani upalungaarsimanermut pisortap, Isak Pjettursonip KNR-imut uppernarsarpaa. Taakku ajoqutaat paasiniarlugu Uummanniaanneqarput.

Pumpip aappaata orsussaa benzin imertanissimasoq paasineqarpoq.

Ikuallattoornermilu pinerliisoqarsimanngitsoq, Pinerluttoqarsimasinnaaneranik misissuisartut nakorsarlu toqusunik misissuisartut misissuinerannit qulakkeerneqarpoq.