Tiileqilaami kommunip sulisui: Piterarmat attaveerunnerput unamminaqaaq
Aatsaallu Tiileqilaami attaveeruttoqanngilinngitsoq nunaqarfimmi kommunip sulisui KNR-imut qaammatip uuma allartinnerani oqaluttuarput.
Piteqqap kingorna ulluni arfinilinni attaveeruteqqaneq Tasiilap eqqaamiuinut qaavatigut eqquivoq.
Tiileqilaami nunaqarfimmi mekanikeriullunilu eqqaavilerisuullunilu qatserisartuusoq Kristian Sinngertaat siullermik ima oqarpoq:
-Akueriuminaattarpoq, kisianni allatut ajornaqaaq, silarsuup piginnaanerminik tamakkua sequtsertapai. Radioqalinngilaq, fjernsyneqanngilaq, mobiileqanngilaq telefoneqanngilaq. Issarmi Eridiumeqartoq (qaammataasakkut oqarasuaat) taannaannaq attaveqaatigaarput, soorlu bankimit tigusiniarutta aatsaat Eridiumikkut Grønlandsbankimut tigusisinnaalluta.
AAMMA ATUARUK Mikkel Bianco: Piterarmat sarfaarukkatta annilaangaleraluarpugut
Kommunimi suleqataa Karoline Bianco ima oqaluttuarpoq:
- Piterarmat unnuaani attaveeruppugut. Ullut tallimat-arfinillit attaveqanngilagut. Aamma taassuma siuliani aamma taama sivisutigisumik attaveqanngilagut.
Septembari qiteqqusimalersoq sapaatit akunnerata missaani aamma attaveerussimallutik oqaluttuarpoq:
-Unamminarpoq soorunalimi. Sianersinnaananilu allassinnaananilu internetilu atorsinnaannagu. Arlaannik pinartoqassagaluarpat, soorlu napparsimmavimmut qatserisartunullu sianersinnaanngilagut. Soorunami unamminarpoq.
Tiilerilaaq
Atassuteqaatit attaveerummata akissarsiassat kinguaattoorput aningaasanillu aningaaserivimmmiit tigusisoqarsinnaajunnaarpoq pisiniartoqarsinnaajunnaarlunilu. Tamanna innuttaasut arlallit kommunimut ikioqqullutik saaffiginninnerannik kinguneqarsimasoq, Karoline Bianco oqaluttuarpoq.
Ullut arlallit qanngiutereersut Pilersuisoq aatsaat oqarasuaammik qaammataasakkoortumik Eridiumimik pissarsisimavoq.
Utoqqalinersiutillit kiassarsinnaanngitsut
Tiileqilaami innuttaasut pisortat ikiorsiissutaannik assigiinngitsutigut pisartagallit, soorlu utoqqalinersiutillit attaveerunnermit pingaartumik eqqugaasut Karoline Bianco oqarpoq:
-Soorunami aamma unamminarsimassapput, soorlu Gasoliamik diesel uuliamillu pissarsinissamut sivitsortuulerlutik. Taakkuinnaanngillalli, nunaqarfimmiut tamarmik gasoliemik dieseloliemillu ikummateqarmata.
Taamaammat Tiileqilaami siunissami qaammataasakkoortumik oqarasuaateqalernissaa Kristian Sinngertaap kissaatigaa:
- Taamaattoqartariaqaraluarpoq. Soorlu assersuutigalugu KNI, nakorsaqarfik kommunefodeqarfillu, politeeqarfimminngaanniit takkua, napparsimaveqarfimminngaanniit pinngitsooratik pisariaqartinneqarput. Eridiumeqartormi aallarsimappat, allatut ajornartumik ajuilluni ajussaaq.
Tassungalu Karoline Bianco isumaqataavoq:
-Pisariaqarpasilerpoq. Pisaarnissaq ataatsimiinnissatsinni siunnersuutigisinnaassavarput.
