Tiilerilaaq Isertorlu suli attaveqanngitsut inulli ajunngitsut
Tusassip sakkortusaavia, Tasiilap kitaaniittoq, sapaatit akunnerisa naanerannili ajoquteqarpoq. Tiilerilaami Isertumilu mobiilinut, oqarasuaatinut, tv-mut, radiomut, VHF radiomilu kanal 16 27-lu tamarmik suli atorsinnaanngillat.
Inuilli tamarmik ajunngitsut, Kalaallit Nunaanni Politiit KNR-imut paasissutissiipput.
AAMMA ATUARUK Tiilerilaami Isertumilu attaveqaatit tamarmik ajortut
Taakkua Kommuneqarfik Sermersuumeertumik ilaqarlutik ippassaq nunaqarfinniipput.
- Eqqissiallannarpoq taamatut takullugit inuttai aamma illui ajoquteqanngitsut, Kommuneqarfik Sermersuumi sullissisoq, Ole Jens Lundblad KNR-mut oqarpoq.
Piteraq peqqutaanersoq ilisimaneqanngitsoq
Tusassip teknikerii, Tasiilamit sakkortusaaveqarfimmut ippassarli aallartussaagaluartut, pujornera peqqutigalugu maanna suli aallanngitsut Tusass KNR-mut paasissutissiivoq.
Tasiilami eqqaanilu sakkortuumik piteraqqammernera attaveqaatit ajornerannut peqqutaanersoq Tusassimeersut misissuitinnatik akisinnaanngilaat.
Aseruatitertoqarpoq - najugaqarfiunngitsulli
Kommunimi sullissisoq Isertumi annikitsuinnarnik ajoqusertoqartoq oqarpoq.
- Aseruatiternerit tassani annikitsuaraapput. Toqusut inaata matua aserorsimavoq kiisalu aamma puttasut taakkua aamma aserorsimapput, Ole Jens Lundblad oqarpoq.
Taassuma oqarnera naapertorlugu piteraq Isertumut akunnerni pingasuinnarni takkusimaarpoq, Tasiilamiillu sakkukinnerulluni.
Taakkua 50-nik inulimmit Isertumeereerlutik umiatsiamik Tiilerilaamut, 84-nik inulimmut alakkaapput.
- Aamma qujanartumik Tiniteqilaarmiut ajunngillat, aamma ajoqusertoqarsimanngillat. Kiisalu illunik assigisaannillu aseruatitertoqarsimanani, Ole Jens Lundblad oqarpoq.
Tasiilami politeeqarfimmi aqutsisup, Alan Lægteskov-ip Tiilerilaami Isertumilu inuit ajunngitsut KNR-mut uppernarsarpaa.
- Tikinnerput tupaallaatigilaarpaat. Piteraq Tasiilamitut sakkortutiginngitsumik misigisimavaat. Taamaattumik attaveqaatit ajornerat taakkua ajornartorsiutiginerpaavaat, taanna oqarpoq.
