Timersoqatigiit Kattuffiata timersornermut naalakkersuisoqalerneq nuannaarutigigaa

Naalakkersuisut nutaat akornanni timersornermut naalakkersuisoqalertoq, Timersoqatigiit Kattuffiata nuannaarutigaa.

Peter Olsenimi Inuit Ataqatigiit sinnerlugit Ilinniartitaanermut, Kultureqarnermut, Timersornermut Ilageeqarnermullu Naalakkersuisunngorpoq.

- Taamatut iliorneq nunatsinni timersornermut angeqaaq, tassalu immineq naalakkersuisoqalerneq. Tamannalu tiguarput, politikkikkut timersornerullu naleqassusianik pingaarnersiuinermilu ersittuutinneqalernissaanik oqariartuutitut. Ila taamatut iliornermit pitsaanerusumik kissaateqarsinnaanngilagut, Timersoqatigiit Kattufiata siulittaasua Nuka Kleemann tusagassiuutinut nalunaarpoq.

Kajungernerulersitsivoq

Timersoqatigiit Kattuffiata aqqa naalakkersuisoqatigiilersut naalakkersuisoqatigiilernissamut isumaqatigiissutaanni ilaatinneqartoq, taanna aamma erseqqissaavoq.

Timersoqatigiit Kattuffiata siunnerfia, tassa timitsinnik aalatitsinerulernissamut siunnerfik, naalakkersuisoqatigiinnit tapersersorneqassasoq ilaatigut allaqqavoq. 

AAMMA ATUARUK Peter Olsen: Beslutningen gjorde ondt i hjertet

- Taamatut naalakkersuisoqatigiiliornermi isumaqatigiissummi allassimalernerput, ersersinneqarluni politikerinit nuimanerpaanit suliniutitsinni ikorfartorneqarumanerput, suli siunnerfik anguniarlugu ingerlaqqinnissamut kajungernerulersitsivoq uppernarsitinneqarluni allannguisinnaasugut, inuiaqatigiinnut nukittorsaataasussamik, ataasiakkaajusunut inuiaqatigiittullu pitsaanerusumik inuulernissatsinnut, Timersoqatigiit Kattuffiata siulittaasua Nuka Kleemann oqarpoq.

Nunatta nunat akornanni timimik aalatitsiviunerpaatut 2030-mi inissisimalernissaa Timersoqatigiit Kattuffiata siunnerfigaa, siunnerfillu taanna iluatsissappat siammasissumik tapersersorneqartariaqartoq aaqqissuussaanikkullu allannguisoqartariaqartoq, Nuka Kleemann oqarpoq. 

AAMMA ATUARUK Isumaqatigiissummit tigulaarineq: Isummersuisit nutaat, inissaaleqisuerunneq Kuannersuarnilu suliniummik taamatitsineq

- Taamaattumik qilanaaqaagut timersornermi siuttuusussamik naalakkersuisumik peqaleratta, Nuka Kleemann oqarpoq.

Naalakkersuisunngortut Inatsisartunngortullu pisortatigoortumik tallimanngormat apriilip ulluisa 23-anni akuersissutigineqarput.