Tivoli Friheden siusinnerpaamik marlunngorpat ammaqqissaaq - sulili killilersuisoqassaaq
Aarhusimi nuannaariartarfik Tivoli Friheden siusinnerpaamik marlunngorpat ammaqqikkumaarpoq.
Pisortaaneq Henrik Ragborg Olesen arfininngornermi taama oqarpoq.
Niviarsiaraq 14-inik ukiulik rutsjebanimi Cobramik taaguutilimmi sisamanngormat ajutoortoqarnerani ajunaareersorlu Tivoli Friheden matugallarneqarpoq.
Nuannaariartarfiup ammaqqinnginnerani nuannaariartarfimmi sulisut tarnip pissusaanik ilisimasalimmit oqaloqatigilluarneqaqqaarnissaat pingaaruteqartoq, pisortaanerup oqaatigaa.
Tivoli Frihedenili marlunngorpat ammaqqissanersoq suli nalornissutigineqarpoq. Qaqugu ammaqqissanersoq nalunaarutigineqarumaarpoq.
Rutsjebane Cobra ammaqqinnavianngilaq
Naallu nuannaariartarfik ammaqqikkumaartoq rutsjebani Cobra ammaqqinnavianngilaq. Ajunaartoqarnerami pissutaalluni taanna maanna matuneqarpoq.
Tivoli Frihedenemi rutsjebanimi tassani 2008-mi aamma ajutoortoqarpoq, inuit sisamat taamanikkut ajoquserlutik.
Pisortap oqarnera naapertorlugu nuannaariartarfimmi misigisassat allat isumannartoqanngillat.
Sisamanngormat ajutoortoqarneranut suna pissutaanersoq suli paasineqanngilaq. Østjyllands Politi tamanna pillugu misissuileruttorpoq.
/ritzau/
