Trump 2024-mi præsidentinngorniarniarpasittoq
2024-mi præsidentinngorniarniarluni, USA-mi præsidentiusimasup Donald Trumpip apersorneqarami ilimasaarutigaa, qaqugorpiarli qineqqusaarnissi suli aalajanginngikkini oqaatigalugu.
- Qinersivinnissamut novembarimi qinersigallartoqannginnerani qinersigallartoqareerneraniluunniit qineqqusaassanersunga apeqqutaaginnalerpoq, taanna amerikamiut aviisiisa ilaannut New Yorkimut oqarpoq.
USA-mi qinersivittoqarnissaanut marlunngornermi novembarip arfineq-pingajuanni qinersigallartoqassaaq.
Trump ukiut marluk qaangiuppata præsidentinngorniarniarnersoq toqqaannartumik aperineqarami aalajangereersimanerarpoq.
Inuit præsidentinngorniarniaqqusisut amerlapput
Trump tapersersuisuminik qinersivinnissamut qinersigallartoqannginnerani katersuinissi anguniarlugu septembarimi qineqqusaalissasoq, amerikamiut aviisiisa ilaat The Washington Post qanittukkut allappoq. USA-milu qinersigallartoqareernerani inatsisartuni amerlanerussuteqaqqilissallutik, republikanerit neriuutigaat.
Trumpip qinersigallartoqannginnerani qineqqusaalissagunavittoq, politikkikkut siunnersorti ilaat The Washington Postimut oqarpoq.
AAMMA ATUARUK Trumpip USA-mi inatsisartut ataatsimiittarfiannik saassussisoqarneranik tusarniaanerit naapertuilluannginnerunerarai
Republikanerit akornanni unammillertigeratarsinnaasani qinersigallartoqannginnerani qineqqusaaruni qineqqusaallatsaalisinnaassallugit, Trumpip ilimagaa. Ingammik Floridami guvernøri, Ron DeSantis, unammillertigeratarsinnaasaata ilagaat, taannalu nuannarineqarluartoq inunnik isumasiunerit takutippaat.
- Qineqqusaassaguma qineqqusaanngitsoortut amerlassagunaqaat, Trump aviisimut New Yorkimut oqarpoq.
- Inuit præsidentinngorniarniaqqusisut amerlapput, taanna ilanngullugu oqarpoq.
2020-mi qinersinermi peqquserluttuliortoqarsimaneraasoq
Trumpilu præsidentinngorniarniassappat 2020-mi qinersinermi peqquserluttuliortoqarsimaneraasimasut unnerluutigineqarnissaa ajornakusoornerulerataannaassasoq, nutaarsiassaqartitsivik dpa allappoq.
Trumpip 2024-mi præsidentinngorniniarnini qinersigallartoqareernerani aatsaat nalunaarutigippagu pitsaanerussasoq, republikanerit siuttuisa ilarpaalui isumaqarput.
