Trump unnerluutigineqassasoq USA-mi ataatsimiititaliap nalunaarutigigaa

Amerikami Repræsentanternes Husimi ataatsimiititaliat siorna januaarip arferngani USA-mi inatsisartut illorsuanut inuppassuit akerliusut aqunneqarpiarsinnaanngitsumik isaanerat pillugu misissuiffigereerlugu amerikap inatsisinik atortitsinermut ministeriaqarfianut USA-mi præsidentiusimasoq Donald Trump pikitsitsinermut peqataasimasutut immikkoortunik sisamanik unnerluutigineqassasoq nalunaarutigaat.

Ataatsimiititaliami peqataasut tamarmik isumaqatigiissutigaat, Donald Trump inuppassuit naalagaaffiup illorsuanut isaallutik pikitsitsinerinut peqatiginnipiluttutut arlalinnik unnerluutigineqassasoq.

Eqqunngitsunilli nassuiaateqarluni saqqummiussisimanera matumani aamma isiginiarneqarpoq.

Aammali Trumpimut qanittumik suleqatiginnissimasut arlallit ataatsimiititaliamut pisoq pillugu naliliisunut ilisimannittuujumanngitsut pineqarput.

AAMMA ATUARUK Ataatsimiititaliap Trump USA-mi inatsisartut ataatsimiittarfiannik siorna saassussisoqarnera pillugu aggersarniaraa

Siornami januaarip arfernani Joe Biden præsidentimut qinigaammat Trumpimut illersuisorpassuit USA-mi inatsisartut illorsuanut isaallutik sakkortuumik pikitsitsipput, inuit sisamat inuunerannik naleqartumik.

Trumpillu taamani oqaatigaa, qinersinerup inernerani (tassa Joe Biden qinigaammat) peqquserluttoqarsimasoq, namminerlu taannaalluni præsidentini inatsisitigut naapertuilluartuusoq.

Trumpimut illersuisorpassuit inatsisartut illorsuanut isaallutik saassussinngilaataanni oqarsimanerarneqarportaaq ima: ”Qaa tamannguat akersuutipilooritsi”.

Inatsisartut illorsuatalu saani katersuuttunut Trump peqataaniarluni neriorsuisimavoq.

AAMMA ATUARUK Joe Bidenip ajugaanera Kongressip uppernarsarpaa