Trumpip akerliussutsimik takutitsisut sakkutuulersuunniarai

USA-mi taartumik amilik George Floyd, politiinit tigummigallarneqarnermini toqummat, USA-mi sumiiffinni arlalippassuarni sakkortuumik akerliussutsimik takutitsisoqarpoq.

Akerliussutsimik takutitsisut præsident Donald Trumpip sakkortusaarfigalugit unitsinniarniarini tusagassiortunik katersortitsinermini oqarpoq. Nutaarsiassaqartitsivik Reuters taama allappoq.

Akerliussutsimik takutitsisut akiorniarnerinut inuinnaat sakkutuullu pisinnaasut tamaasa ikiorsiullugit unitsitsiniaaniarluni Trump oqarpoq.

- Sakkutuut Nationalgardenimeersut naammattut sulisinnissaat guvenørimut sakkortuumik kaammattuutigaara. Borgmesterit guvenørillu eqqissiviilliornerni nakuusernerit unitsinniarnissaannut naammattunik sulisitsissapput, Trump oqarpoq.

Sakkutuut tuusintilikkuutaat Washingtonimi nakkutilliilissasut præsindent Trumpip aamma oqaatigigaa, nutaarsiassaqartitsivik AFP allappoq.

AAMMA ATUARUK Minneapolisimi eqqissiviilliornerit sakkutuunit arlalinnit orniguffigineqartariaqartut

Taartumik amilik George Floyd toqutaaneranit USA-mi akerliussutsimik takutitsinerit sapaatit akunnerisa siulianni aallartipput.

George Floyd sapaatit akunnerisa siulianni ataasinngornermi toqutaavoq, taanna Minnesotap illoqarfiisa ilaanni Minneapolisimi politiimit qaamasumik amilimmit toqunneqarpoq. Floyd toqqusassineqarluni qitimigullu sakkortuumik naqeqqaneqarnerminit toqquteqartoq misissorneqarnerani paasineqarpoq.

Ammip qalipaataanik imikkoortitsineq politiillu USA-mi nakuusertarnerat Amerikami illoqarfippassuani innuttaasut akuersaarnagu akerliussutsimik takutitsiffigaat.

Akerliussutsimik takutitsisut 5600-nit ikinngerunngitsut tigusarineqarput.