Trumpimut siunnersortaasimasoq peqquserluttuliorsimasutut unnerluutigineqartoq
USA-mi præsidentiusimasup, Donald Trumpip, pilersaarusiornermut pisortarisimasaa, Steve Bannon, assingiinngitsunut arfinilinnut peqquserluttuliorsimasutut sisamanngornermi unnerluutigineqarpoq.
68-nik ukiulik Bannon, pinerlunnikkut aningaasarsianik malunnarunnaarsaarisimasutut, peqatigiinniapilussimasutut ,aaqqissuussanillu peqquserluttuliorsimasutut New Yorkimi eqqartuussivimmi unnerluutigineqarpoq.
Bannon præsidentiusimasup Donald Trumpip USA-p Mexicomut killeqarffani qarmarsualiorniarnerani peqquserluttuliorsimasorineqarpoq.
AAMMA ATUARUK Trumpip saammaassai 73-iusut
Bannon angutillu allat pingasut Trumpip "We Build the Wall"-imik taallugu killeqarfimmi qarmarsualiorniarnerani aningaasanik katersuiniartoqarnerani aningaasaliiniartunut peqquserluttuliorsimasutut ukiut marluk matuma siorna tassa 2020-mi aggustimi unnerluutigineqarput.
Tassa aningaasanik 25 millionit dollarsinik, koruuninngorlugit 188 millionit koruuninik peqquserluttuliorsimasutut unnerluutigineqarput.
Bannon unnerluussutinut pisuunnginerarpoq, aningaasanillu 1 million dollarsinik imminermut nuussisimasutut unnerluutigineqarnini ilumuunnginnerarlugu.
Bannon unnerluussutinut 2021-mi januaarimi præsident Trumpimit saammaanneqarpoq, Donald Trump præsidentiujunnaarluni præsidentip illorsuanit nuunnissaa sioqqutilaarlugu.
