Tusaannga sivisunerusumik ammasalerpoq
- Imminut toquttartut amerlassusaat annikillisissavagut, taamaattumik inuit imminut toqunnissamik eqqarsaateqartartut ikiorneqarnissaannik piffissaq eqqorlugu nalaarluarneqarsinnaapput.
Meeqqanut inuusuttunullu naalakkersuisoq, Paneeraq Olsen oqarpoq.
Tusaanngap oqarasuaataa unnukkut sapaatillu akunnerata naanerani ammasalerneratigut kisitsisit ikiliartussasut Naalakkersuisoq oqarpoq.
Taamaammat Tusaannga ulluinnarni ullut tamaasa unnuaqeqqata tungaanut, tallimanngorneq arfininngornerlu ullaassakkut sisamat tungaanut sapaammi unnuaqeqqata tungaanut ammasalerpoq.
Ikiorneqarnissamik pisariaqartitsivit?
Imminnut toqunnissamik eqqarsaateqaraanni imaluunniit kisimiittutut misigisimagaani Tusaannga oqarasuaat 801180 imaluunniit sms 1899 attavigineqarsinnaavoq.
Oqaloqatiginninneq akeqanngilaq, kinaassutsimilli taasisoqartariaqarani.
Tusaanna pillugu annerusumik uani atuagaqarsinnaavutit.
Imminut toqunnissaminnik eqqarsaateqarlutik Tusaanngamut sianertut amerlanerpaajusarput. Taakkuuppullu pilertortumik ikiorneqarnissaminnik pisariaqartitsisut.
- Tusaanngap ammanerusalernerani alianartumik pisoqarnissaa pinaveersaartissinnaavarput, tassani inuup imminut toqunnissaa pitsaaliorlugu. Inuup aliasorujussuarnera pitsaaliorniarparput, taamaalisoqarpallu ikiuussinnaanerput tamaat ikiuutissaagut, Meeqqanut, Inuusuttunut Ilaqutariinnullu Naalakkersuisoq, Paneeraq Olsen oqarpoq.
Oqarasuaatikkut siunnersuisarfik Tusaannga 2019-imi februaarip aallaqqaataani ammarpoq.
Inuit 2.576-it siorna Tusaanngamit ikiorneqarput. Tassa ukiup siuliani sianertut 240-nik amerleriarlutik.
Tusaanngamut sianerlutik attaveqartartut aatsaat taama amerleriaatigaat. Siorna saaffiginnittut 40 procentii siullermeerlutik aatsaat saaffiginnipput.
Oqarasuaat ukiut pingasut atuuppoq
Kalaallit Nunaanni politiit kisitsisaataat naapertorlugit 2020-mi imminut toquttut 41-upput. Siorna 49-ullutik.
2020-imi imminut toqoriartut 120-upput, siorna 90-iullutik.
Nunarsuullu sinneranut inuttussuseq eqqarsaatigissagaanni nunatsinni imminut toquttut amerlanerpaami inissisimapput.
Imminut toqunnissamik pinaveersaartitsinissamut periusissiaqanngitsoq
Imminut toqunnissaminnik siorna siorasaarisut 1309-upput. Taakku 2020-imut sanilliutissagaanni amerleriarput taamanimi imminut toqunnissaminnik siorasaarisut 1201-iupput.
Naalakkersuisut imminut toqunnissamik pinaveersaartitsinissamut periusissiaq 2013-imiit 2019-ip tungaanut atuuttoq qaangiuppoq. Maanna periusissiaqanngilaq, isumaginninnermut naalakkersuisoq, Mimi Karlsen (IA), naapetorlugu periusissiassaq ukiaru naammassineqassaaq.
