Tusagassiorfiit: Kina-miup tennissertartup nuimasup pinngitsaalineqarsimanerarnini tunuartippaa

Kinamiu tennisertartoq Peng Shuai, Kinamiut ministererisimasaata tullianit Zhang Gaolimit kinguaassiutitigut atornerlunneqarsimalluni novembarip aappaanni unnerluutiginnippoq.

Taassuma unnerluutiginninni taamaatiinnaraa tusagassiuutit arlallit tassunga apersuisussaagaluit allaaserinnipput.

- Siullermik naqissuserusuppara, oqarnikuunngisaannarlungalu allanngisaannarnikuuvunga kinguaassiutitigut atornerlunneqarnikuullunga, taanna videoliani aqqutigalugu saqqummiussivoq.

Atornerlugaanikuunnginnerminik oqariartornera nammineq piumassutsiminik oqaatigineraa imaluunniit taamatut oqaqqusaanersoq arlalinnit isumaliutersuutigineqarpoq.

Peng nammineq inuttut WTA-p pisortaanut Steve Simonimut atornerlunneqarsimanini pillugu qaammatip siuliani allagaqarnikuulluni videoliami sapaatiummat saqqummersumi oqarpoq, maannali ilumuunnginneraalluni.

Taamanili nunat tamalaat akornanni arnat tennisertartut peqatigiiffiata, WTA-p, Kinami tennisimik unammiuaarnissat tamaasa taamaatiinnarpai.

- Peng Shuaip killilimmik attaveqarsinnaatillugu, atornerlunneqarsimanerminillu oqaatiginneqqusaannginnguatsiarnerani tamaani ilerasuuteqarnanga timersortartuutigut unammisissinnaanngilakka, peqatigiiffimmi WTA-mi siulittaasuusoq pisortaasorlu, Steve Simon oqarpoq.