Tusass: Unnuaru aatsaat attaveerutsitsissaagut

Nuummi parabolimut nutaamut nuussisoqarnera pissutigalugu qaammataasanut attaveqarnernut Nuummut Nuummiillu attaviit unnukkut nalunaaqutaq aqqanermiit attaveerutsinneqassasut, Tusass marlunngornermi nalunaarpoq. Tusassilli piffissaq kukkusoq nalunaarutigisimagini kingorna nalunaarpoq.

Allattoq Nutaarsiassaqartitsivik / Nyhedsredaktionen

juunip 15-at 2022 11:36

Qaquguli taamaaliortoqarnissaa pillugu piffissaq kukkusoq nalunaarutigisimagini Tusass KNR-imut ilisimatitsivoq, parabolimullu nutaamut nuussisoqarnissaa sisamanngornermi unnukkut nalunaaqutaq aqqanermiit tamanna aatsaat pissasoq nalunaarutigalugu.

Tusassip Nuummi parabolimut nutaamut nuussisoqarnera pissutigalugu qaammataasanut attaveqarnernut Nuummut Nuummiillu attaviit unnugu nalunaaqutaq aqqanermiit attaveerutitissavai, tassalu matumani pineqarput; Qaanaaq, Ittoqqortoormiit, Tasiilaq nunaqarfiilu, Upernavik nunaqarfiilu, Pituffik aammalu aatsitassarsiorfiit.

Taamaammat oqarasuaatit, internetti, tv, raadiulu sumiiffiit ilaanni attaveerukkallassapput.

Tusassip attaviit unnuaru nalunaaqutaq 02.00-p missaani attaveqaqqilissangatippai.

Nutaarsiassami kukkunermik nassaarsimaguit uunga allaffigineqarsinnaavugut.