Tusassimit atuisuuffiit aggustimit atorneqarsinnaajunnaassasut
Pituffimmi Tusassimik atuisuuffik aggustip 31-anit pissarsiarineqarsinnaajunnaassaaq.
Tusassip tamanna tallimanngormat nalunaarutigaa.
Pituffimmi qaammataasakkut attaveqaat maanna atuuttoq qaammataasap Greensatip qaammataasatigut kiffartuussineq tamarmik nangittussanngormagu aasamut matussaaq.
Qaammataasaq Greensat nunatsinnut atsiussaasoq avataarsuanut februaarip arfernani aallartinneqarpoq, tassannga nunatta avannaani tunumilu qaammataasatigut attaveqaateqartut pitsaanerusumik attaveqartinneqalissapput, Qaanaamilu atuisartut flatrademik attaveqaateqarsinnaalissallutik.
Pituffili atuisartunut qaammataasaq nutaaq sivikitsuinnarmik nuannaarutaassaaq.
US Space Forcemmi qaammataasaq nutaaq Greensat aqqutigalugu ingerlatsinerup aningaasalernissaa kissaatiginngilaa.
Pituffimmi atuisartut Tusassimik atuisuusut SMS-ikkut nalunaarfigineqarput. Tusassip Pituffimmi kiffartuussinini tamarmi aggustip 31-ani matussavaa.
Tamatuma saniatgiut KNR Radio TV-lu tusarnaarneqarsinnaajunnaarlutillu isiginnaarneqarsinnaajunnaassapput, Tusassilu internettimik pisinissamut aamma neqerooruteqarunnaassalluni.
Suliariumannittussarsiuussisoqarnerata kingorna US Space Forcep attaveqaatit pillugit suliffeqarfik alla toqqarsimagaa, sermitsiaq.ag allappoq.
