Tusass: Imaatigut kabelip suliarineqarnera aqagu naammassinissaa naatsorsuutigaarput
Nutarterneqarpoq nalunaaqutaq 15:52: Tusassip imaatigut kabelip iluarsaannerani aqagu imaluunniit kingusinnerpaamik sapaatiuppat naammassinninnissartik naatsorsuutigaa.
Nuup kujataani internettikkut attaveqaatit sapaatiummalli unammillernangaatsiarput.
Teknikerimmi imaatigut kabelip ajoquteqarnera iluarsaappaat – iluarsaanneqarneralu sapaatit akunnerinik malungajannik sivisussuseqassasoq aallaqqaammut naatsorsuutigineqarpoq.
Kisianni taama sivisutigisariaqarunanngilaq. Tusassimmi iluarsaassinini aqagu kingusinnerpaamilluunniit sapaatiuppat naammassissallugu naatsorsuutigaa.
Nuup kujataaniittut taamaalillutik internetti nalinginnaasumik sukkassuseqartoq atorsinnaaleqqissavaat.
- Anori, sila ingerlasussanillu piareersarnerit aqutsinerlu ingerlalluarsimapput, maannalu imaatigut kabelip iluarsaanneqarnera naammassiartuaarneqalerpoq. Tamannalu isumaqarpoq ullumi kingusinnerusukkut imaatigut kabelip iluarsaanneqarnerata naammassivinnissaa qaqugorpiaassanersoq nalunaarutigisinnaanngussagatsigu,Tusassimi teknikkikkut pisortaq, Jonas Hasselriis oqarpoq.
- Nuannaarutigaarput imaatigut kabelip iluarsaanneqarnerata nalunaaruteqaqqaarnitsinniit siusinnerusukkut naammassineqarnissaa nalunaarutigisinnaanngoratsigu.
AAMMA ATUARUK Esther Petersenip Campus Kujallermi internettip arriippallaarnera ilungersuutigigaa
Imaatigut kabelip iluarsaanneqarnera pissutigalugu Nuup kujataaniittuni angerlarsimaffinni internettit inuussutissarsiuteqartullu internettimut attavii sapaatiummat ullaap tungaanili aalaakkaajunnaarput.
Imaatigut kabelip immap naqqani 300-init 400 meterinut ititigisumiippoq, taamaammat iluarsaassinerup ilaa imaani suliarineqarpoq.
- Naak sulisugut umiarsuarmilu suliaqartut anorimit sialummillu eqqugaaqqagaluarlutik iluarsaassineq sapinngisaminnik sukkasuumik suliaraat, Jonas Hasselriis oqarpoq.
