Tyrkiap Syriallu killeqarfiata nalaani nuna sajummat inuit pingasut ajunaartut

Tyrkiap kujasissortaani nuna sajoqqimmat inuit pingasunit ikinnerunngitsut ajunaarput, allallu 213-it aqqunartiterlutik. Nuna Richterip nunap sajuttarneranik uuttuutaa naapertorlugu 6,3-tut sakkortutigisumik sajuppoq.

Tyrkiap nunamut namminermut ministereqarfia taama nalunaaruteqarpoq. Nutaarsiassaqartitsivik Reuters taama allaaserisaqarpoq.

Tyrkiap Syriallu killeqarfiata nalaani nuna ataasingornermi ualikkut sajuppoq. Nuna 2 kilometeritut ititigisumi sajuttoq, Europap nunap sajuttarneranik nakkutilliisoqarfiata, EMSC-p, nalunaarutigaa.

Nuna 6,3-tut sakkortutigisumik sajuttoq, USA-p nunap sajuttarneranik nakkutilliisoqarfiata USGS-ip aamma ilisimatitsissutigaa.

Tyrkiami nunap immikkoortuani Hatayimi illoqarfiup Antakyap nalaani nuna sajuppoq.

Nunap sajunnera Syriami, Egyptenimi Libanonimilu aamma malugineqarsinnaasimasoq takunnittut nutaarsiassasqartitsivimmut Reutersimut oqaatigaat.

Franskit nutaarsiassaqartitsiviat AFP naapertorlugu nunap immikkoortua Hatay eqqorneqarpaavoq.

Tyrkiami nuna februaarip ulluisa arfernanni sajorujussuarpoq, Tyrkiami Syriamilu ajunaartut katillutik 47.000-t sinnerpaat, inuillu millionilikkaat taassuma saniatigut angerlarsimaffeerullutik.