Tysklandimi atomimik nukiliorfiit matuneqarnissaat kinguartinneqartut

Tysklandimi atomimik nukiliorfiit pingasut akornanni marluk suli atorneqarallassasut, Tysklandimi naalakkersuisut aalajangerput. Innaallagissamik ukioru suli pilersuisoqarsinnaanissaa Tysklandimi naalakkersuisut qulakkeerumavaat.

Tysklandimi naalakkersuisut taama ilisimatitsisut, nutaarsiassaqartitsivik Reuters allappoq.

Tysklandimi atomimik nukiliorfiit kingusinnerpaamik ukioq manna matuneqarnissaat, Tysklandip forbundskansleriata Olaf Scholzip maannamut aalajangiusimagaluarpaa.

Ukrainelli Ruslandillu akornanni sorsuttoqalereersorlu gassissaalatsisoqalerpoq, kiassarneq ikummatissallu akitsorlutik. Taamaammat atomimik nukissiuuteqarneq pillugu allatut eqqarsartoqalerpoq.

Rusland sorsuttoqanngikkallarmat gassimik akikinnerusumik Europamut pilersuisaraluarpoq, Ukrainemulli saassussereernermini pilersuinikinnerulersimalluni. Taamaammat ikummatissat Europami ajornartoorutaalerput.

AAMMA ATUARUK EU-p uuliamik suli akuiagaanngitsumik Ruslandimit eqqussuinini unitsinniaraa

Nunat Europamiittut gassimik Ruslandimeersumik isumalluuteqarpallaarunnaarnissartik sulissutigivaat, taamaalillutillu nukissiuutinik allanik ujartuisariaqarlutik.

Tysklandip atomimik nukissiuuteqarnera nunami tassani politikerinit soqutigisaqaqatigiinniillu upernaaq aasaq mannalu oqallisigineqangaatsiarpoq, apeqqullu forbundskanslerimut nukingernartunngorsimalluni.

Atomip nukinganik Tysklandimi atortussanngortitsiviit pingasut atorneqarnerisa sivitsorneqarnissaat, Tysklandimi inunnik isumasiuinermi apersorneqartut 70 procentiisa tapersersoraat qaammatip ataatsip matuma siornatigut paasinarsivoq.

Atomimilli nukiliorfiit Tysklandip innaallagissamik pilersorneqarnerata 6 procentiinnarigaa, Olaf Scholzip erseqqissaatigaa.

Innuttaasut suliffeqarfiillu nukissiuutitigut ajornartoortoqarnerani ikiorserneqassasut, Tysklandimi oqartussat neriorsuutiginikuuaat.