Ujarassiorimmi ajugaasut toqqarneqarput
Kujataamioq Narsarmijineersoq, Ludvig Noahsen, siorna ujarassiortunut peqataasoq ajugaalluni 55.000 koruuninnappoq.
Ujarassiorit nuna tamakkerlugu ujarassiorneruvoq, taannalu 1989-imili aasat tamaasa ingerlanneqartarluni.
Ujarak ajugaassutaa ujarak ujaqqanit aassimasunit pinngortoq annerusumik mineraalimik amfibolimik sananeqaateqartoq, Narsarmijit kilometerinik qulinik kippasitsigisumi qeqertami Avallermi nassaajuvoq.
AAMMA ATUARUK Ukioq manna ujarassiorimmi ajugaasoq: Tuttunniarnermini ujaqqamik soqutiginartumik nassaartoq
Ujarallu taanna soqutiginarluinnartoq, Namminersorlutik Oqartussat nalunaarput. Kujataatalu kujasinnerusortaani aatsitassanik qaqutigoortunik nassaassaqarsinnaaneranut tikkuussisuulluni.
Aatsitassat ujaqqami nassaarineqartumiittut saviup kajungerisaanut atortussiarineqartarput, soorlu sarfaliuutini anorip erngullu nikuginik innaallagissiutinini aammattaarlu biilit innaallagiatornut motoriinut, atuisut atortorissaarutaannut assigiinngitsunut, teknologimilu nutaaliaasumi atorneqartuullutik.
Tunumeersoq 2-nngortoq
Sermiligaarmioq, Simujoq Nathanielsen, ujarassiorit 2021-imi ajugaaasup tulleraluni 25.000 koruuninik ajugaassuteqarpoq.
- Ujarak taanna kanngussammik aamma nikkelimik kobolimillu akoqarpoq. Sumiiffik nassaarfiusoq eqqaalu aatsitassarsiornikkut annikitsuinnarmik misissuiffigineqarsimavoq nassaallu suut nassaassatut ilimagineqarsinnaanerinik takutitsisuulluni.
Ajugaasullu marluk 3-nngorput:
Nanortalimmiit, Henrik Emanuelsen aamma Kangersuatsiaaneersoq, Ludvig Knudsen.
Sisamat 4-nngortut:
Attumiit, Otto Larsen, Nuummiit, Mininnguaq Josefsen aamma Per N. Hansen kiisalu Qaanaamiit Pauline Qaerngaaq.
2021-mi Ujarassiorimmut ujaqqat 384-it nassiunneqarsimapput.
Taakkunanngalu ujaqqat 135 akusiorlugit laboratoriami misissorneqarsimapput.
Ujarassiorimmi nersornaasiinerit juullinnginnerani tunniunneqartaraluarput, nunamullu allamut nassiussinissap kinguaattoornera coronalu pissutigalugut tamanna ukioq manna kinguaattoorpoq.
