Ukiortaaq politiinut ulapaarfiusoq

- Inuit arfinillit silattorserlugit isertitsivimmiitippagut, qummoroortarnerulli kinguneranik annerusumik ajutoortoqanngilaq.. 

Politiini pigaartuusoq Jens Rønberg taama KNR-imut ukiortaami nalunaarpoq. Taanna aamma oqarpoq, imaassinnaasoq inuit ilaat namminneq ilisimanngisaminnik ajutoorsimarataannaasut.

Nunarputtaaq tamakkerlugu sumiiffinni amerlanerpaani ukioq nutaaq iserluarfigineqarsimagunarpoq, naak politiit angerlarsimaffinnut eqqissiviilliiorfiusunut aqqusinermilu aalakoortut pillugit aggeqquneqartarsimagaluarlutik.

Ukiortaap ullaavani Nuummi politiit Qinngorpumi Uiffammi silami ikuallattoqarnera pillugu aggeqquneqarput.

Ilaqutariillu pingasunik inuttallit angerlarsimaffimminniit qimagutsinneqarput, angerlarsimaffiat ikuallannermik aseruatitersimammat, ilaquttaminnullu allanut nuutsinneqarallarput.

Danmarkimittaaq ajunnginnerunngillat, 26-nimmi ukiulik angut Koldingimi najugalik persuttarneqarsimanini ukiortaap ullaavani toqqutigaa.

Taama Jyllandimi politiit tusagassiutinut nalunaarput, taakku pisoq toqutsisoqarsimasutut nalunaarutigaat.

Angut 26-nik ukiulik sakkortuumik persuttarneqarsimasoq nassaarineqarpoq Koldingillu napparsimavianukaanneqarami toqukkut qimaguppoq

Danmarkimi pisoq sukumiisumik maanna misissorpaat, ullumilu sapaammi illoqarfiup iluani qimmilisarlutillu teknikerinit suleqateqarlutik misissuinerat malunnarluarsimavoq. Videoliat nakkutilliinermut atugassiat maanna misissorneqarput inunnillu takunnissimasunik sukumiisumik apersuisoqarluni.

Ualerli tikillugu politiit suli tigusarinnissimanatik oqaatigaat.