Ukraine: Russit Kyiv qimallugu kujammut kangimullu sakkortusaajartorput

Ruslandip sakkutuui Ukrainip illoqarfiisa pingaarnersaanniit Kyivimiit aammalu Ukrainep avannaani Tjernihivimiit maanna ”pinasuartumik tunuartertut” nutaarsiassaqartitsivimmit ritzaumit oqaatigineqarpoq

Ukrainemiut præsidentiata siunnersortaa taama nalunaarpoq.

Taannalu naapertorlugu, taama pisoqarneranut patsisaavoq russit sakkuui Ukrainep kangiatungaani kujasissortaanilu atorfissaqartinneqalersimammata.

- Russit Kyivimiit Tjernihivimiillu pinasuartumik tunuarternerat ersersitsivoq, nutaamik periaaseqartoqarnialerunarneranik, tassa kujammut kangimullu illikarput, taanna qarasaasiakkut inuit oqallittarfiatigut taama allappoq.

Tassami Ukrainep kujasissortaani illoqarfimmi umiarsuliveqarfiusumi Marjupolimi sapaatip akunnerini arlalinni russit sakkutuui ungusimmatali sakkortuumik akersuuttoqartuarpoq.

Inuppassuillu 1000-likkaat russit qaartartumeerisaqattaarnerisigut toqorarput, taamatuttaaq illoqarfiit Luhanski Donetskilu sakkortuumik akersuuffiupput, taakkunanilu russisut innuttaassusillit Ukrainemili najugaqartut unguseqqapput.

Oqaatigineqarporlu nunat tamalaat Røde Korsiat arfininngornerup ingerlanerani ikiuiartortunik misilillugu Marjupolimukartitsiniarsarigaluarput. Ilimagineqarpormi inuit 130.000-t missaat sumiiffinni taakkunaniittut ingerlariaqqissinnaanngitsut aammalu nerisassaqaratillu imigassaqanngitsut.

Røde Korsimiit ikiuiartortitat bussit 54-t tallimanngormat taavunngaraluarput, aqqutaanili sorsunnerup sakkortuallaarnera pissutaalluni ingerlaniarneq ajornakusoorpallaarmat utertariaqarsimallutik.

Erseqqissaatigineqarporlu, russit Marjupolimi Sortehavillu sineriaani saassussinertik suli sakkortunerulersikkumaaraat.