Ukrainemiut 870.000-t nunaminnut uteqqipput
Ukrainemiut 870.000-niit amerlanerusut, russillu Ukrainemi sakkutuunik isaatitseqqaalermatali qimaasimagaluartut, maanna utikaasimasut, Ukrainemi killeqarfimmi nakkutilliisut nutaarsiassaqartitsivimmut AFP-mut paasissutissiisimapput.
Oqaatigineqarporlu Ukrainemiut 25.000-t 30.000-llu akornanni amerlassuseqartut illoqarfimmut sungiusimasaminnut ullormut angerlakaasartut, ilaatigut soorlu arnat, meeqqat utoqqaallu.
Angerlamullu utikaasut nassuiaatigisarsimavaat, maanna pissutsit Ukrainemi atuuttut atoruminarnerulaalersimanerat, pingaartumik nunap kippasissortaata nalaani.
Ukrainemmi illoqarfiisa pingaarnersaanni Kyivimiit russit sakkutuui marsip naalerneraniit apriilillu aallartinnerata nalaaniilli tunuarterlutik aallartipput, nalunaarutigineqartartullu naapertorlugit sakkutuut tamatuma nalaaniit Ukrainep kangiata tungaanut illikarnerat peqqutaavoq.
Naalagaaffiit peqatigiit qimaasunut suliniaqatigiiffissuannit UNHCR-miit marlunngormat oqaatigineqarpoq, sorsunneq aallartimmalli Ukrainemiut 4,6 millionit nunaminniit qimaasimasut. Maannali paasinarsiartulerpoq pissutsit maanna illuata tungaanut saakkiartulersut, tassami Ukrainemiorpassuit maanna illoqarfigisaminnut aseruatitersimagaluaqisumut angerlarlutik utikaallattaalermata.
