Ukrainemiut Danmarkimut qimaasut tamarmik najugaqarallarnissamut itigartinneqarsimanngillat

Ukrainemioq Danmarkimut qimaasoq ataaserluunniit Danmarkimi najugaqarallarnissamut qinnuteqaammini manna tikillugu itigartinneqarsimanngilaq, nunanit allanit nunasiniartunut allaffeqarfik aviisimut Jyllands-Postenimut taama oqarsimavoq.

Allaffeqarfiup taassuma naatsorsuutai naapertorlugit apriilip qulinganni Ukrainemiut 3683-t Danmarkimi najugaqarallarnissamut qinnuteqarsimapput.

Sulilu aamma qimaasut 17.000-t qinnuteqaataat akuerineqassanersut suliarineqartussaallutik.

AAMMA ATUARUK Politikerne: Grønland er endnu ikke klar til at modtage flygtninge fra Ukraine

Nunanit allanit nunasiniartunut allaffeqarfiata kisitsisaatai naapertorlugit Ukrainemiut qimaasut 21.000-usutut tagginneqaraluartut, qimaasut taakkunannga amerlanerujussuusut erseqqissaatigineqarpoq, tassami Ukrainemiusut innuttaassusillit nunanut EU-mut ilaasortaasunut angalaniarunik visumeqaratik qanorsuaq angalasinnaatitaapput, nunanilu tamakkunani oqartussanut akuersissummik peqqaanngikkaluarlutik minnerpaamik ulluni 90-ni najugaqarsinnaatitaapput.

Naatsorsuutigineqarporlu, poorski qaangiuppat Ukrainemiut katillugit 40.000-t missaat Danmarkimiilersimanissaat.

Maanilu nunatsinni politikerit suli aalajanginngillat nunarput Ukrainemiunik qimaasunik akuersissanersoq akuersissannginnersorluunniit.

Savalimmiunullu qiviarutta, Savalimmiormiut lagtingiisa akuersissutigaat Ukrainemiunik 200-nik ukiuni marlunni Savalimmiuniikkallartoqarsinnaasoq.