Ukrainep innuttaasut sakkulersornissaannut kaammattorpai

Ukrainemiut naalagaaffimmii innuttaasut sakkulerneqarnissaminnut piareersimasut kaammattorneqarput Ukrainep illersornissaqarfianut ilanngunnerminnut nalunaaqqullugit.

Sisamanngormat Ruslandip nuna saassummagu tamanna pivoq.

Ukrainep præsidentia Volodimir Zelenskij taamatut kaammattuivoq.

Præsidenti aamma oqarpoq Ukrainep naalakkersuisui tamanut Ruslandimut illersorniarlutik sakkoqarusuttunut sakkunik agguaassallutik piareersimasut.

Zelenskij-p tweeterluni Ruslandip saassussinera Tysklandip nazistiusup Sorsunnersuit Aappaata nalaani iliuuserisartagaanut assersuuppai.

- Ullaaq manna Ruslandip killuussilluni nunarput saassuppaa, soorlu Tysklandip nazistiusup  Sorsunnersuit Aappaata ingerlanerni taamaaliortartoq.

- Ullumiminngaanniit silamiut oqaluttuarisaaneranni nunavut illuatungeriilerput. Rusland ajortup aqqutaanut pivoq, Ukrainelu imminut illersorpoq kiffaanngissutsinilu iperarumanagu, Moskvami qanorluunniit isumaqaraluarpata, Zelenskij allappoq.

Rakettinit eqqugaasut 

Sisamanngornermi Ukrainep illersornissamut ministeria Oleksij Reznikov - Zelenskij assigalugu – aamma inuinnarnut innuttaasunut kaammattuivoq Ukrainep naalakekrsuisuisa illersornissaqarfianut saaffiginneqqullugit.

Sisamanngorneq ullaaralaannguaq Ruslandip Ukrainimik tiguaaniarnini aallartippaa. Ukrainemi illoqarfiit arlallit ilaatigut rakettinit. Aamma illoqarfiit pingaarnersaanni Kijevimi eqqaassisoqarneranik nalunaaruteqartoqarpoq.

Ukrainep Ruslandillu akerleriinnerannut peqqutaasoq annertooq tassaavoq nunap ilaa Ukrainep kangia’tungaa. Ilaatigut kunngiitsoqarfittut imminut nalunaarutigisut Donetsk aamma Luhansk tassaniipput.

Sakkortuumik kinguneqartitsinerit ilimasaarutigineqarput 

Ruslandip massakkut saassussinera Ukrainep kangiatungaanuinnaanngilaq. Ukrainep nunanut allanut ministeria Dmytro Kuleba Twitter-imi allappoq.

- Ukrainep kangianuinnaanngitsoq saassussineruvoq. Tassaavoq tamakkiisumik saassussineq sammivinnit assigiinngitsuneersoq, allassimavoq.

- Naamik, Ukrainemiut illersornissaat isasuunngilaq. Ukrainemiut sakkutuui akiuupput. Ukraine aalajaappoq imminullu illersornini nangillugu, nunanut allanut ministeri Twitterimi allappoq.

Ruslandip saassussinera ilaatigut EU-mit, Natomit aamma USA-mit sakkortunerpaamik  assuarliutigineqarpoq.

EU'p nunanut allanut tunngasunut pisortaata Ruslandimut kinguneqartitsinissat oqaluttuarisaanermi aatsaat taama sakkortutigisut ilimasaarutigai.   

- EU sakkortunerpaamik akissaqqaarpoq. EUp oqaluttuarisaanermi aatsaat taama sakkortutigisumik kinguneqartitsinissat ataatsimoortut atuutilersissavai, nunanut allanut tunngasunut pisortaasoq Josep Borrell oqarpoq.