SIK: Ullumi aqaguluunnit isumaqatigiissinnaaneq neriunaateqarpoq

Akissarsiat pillugit isumaqatiginniarnermi kisitsisit SIK-mit pissarsiarineqaqqammerput, taakkulu SIK-mit neriunaateqartutut nalilerneqarput.

- Isumaqatigiissuteqarsinnaanissaq neriunnaateqartutut oqaatigisinnaavara, neriuppunga ullumi aqaguluunnit isumaqatigiittoqassasoq, Jess G Berthelsen  oqarpoq. 

Akissarsiat pillugit isumaqatigiissuteqartoqarsinnaanngippat suliumajunnaartoqassasoq, SIK-p siulittaasuata siusinnerusukkut oqaatigaa. Isumaqatiginniarnerit aggustimi aallartinneqartut maanna nangeqqinneqarput.

- Suli atsioqatigiinngilavut, sulilu isumaqatigiissut naammassivinneqanngilaq, kisianni neriunaateqarpoq, taamaattumik ullumi aqaguluunnit naqissuserlugu isumaqatigiissuteqarsinnaassaagut - neriuppungali aqagu kingusinnerpaamik isumaqatigiissinnaassalluta, SIK-p siulittaasua, Jess G. Berthelsen KNR-imut marlunngornermi ualikkut oqarpoq.