Ullumi corona pillugu kisitsisit: Tunillatsittut nutaat 78-it
Ulloq kingulleq tunillatsissimasut nutaat 78-it paasineqarput. Aasianni ataaseq, Sisimiuni pingasut, Nuummi 73-it kiisalu Qaqortumi ataaseq nassaarineqarput.
Nunatsinni tamani ullumi tunillatsittut nutaat katillugit 341-t nassaarineqarput.
26. decembarimiit misissortittut 7,4 procentii tunillatsissimapput.
26- decembarimiit tunillatsissimasutut paasineqartut ukiui agguaqatigiissillugit 29-nik ukioqarput.
Ataatsimut isigalugit 33 procentii 18-it inorlugit ukioqarput. Inuusuttut 18-it 29-illu akornannik ukiullit tunillatsittut 16 procenteraat. 30-niit 49-nut ukiullit taamaalillutik tunillatsittut 32 procenteraat sinnerilu 18 procentit 50-inik qaangerlugilluunniit ukioqarlutik.
Misissortittut ukiui agguaqatigiissikkaanni, tunillatsissimasut ukiuisa agguaqatigiissinnerannut naleqqutikannerput.
Taamaattorli eqimattakkaat marluk immikkoorput: Inuusuttut 18-it inorlugit ukiullit misissortittut 28 procenteraat, taamaalillutik aguaqatigiissillugu taakkua akornanni tunillatsissimasut allanit amerlanerulaarput.
Eqimattat aappaat immikkoorutillit tassaapput 50-inik sinnerlugilluunniit ukiullit. Taakkua misissortittut 23 procenteraat.
Napparsimmavinni suli sisamat uninngapput, ataaseq angerlaraluartoq alla ataaseq unissimavoq. Napparsimasoq ataaseq Nuummut katsorsartikkiartortinneqarpoq.
Kommunikkaarlugit agguaqatigiinneri imatut isikkoqarput:
- Avannaata Kommunia: arfineq-marluk
- Kommune Qeqertalik: 46-t
- Qeqqata Kommunia: Tallimat
- Kommuneqarfiq Sermersooq: 280-it
- Kommune Kujalleq: pingasut.
Coronali tuniluutileqqaarmat nunarsuatsinni tamani sapaatip akunnerani kingullermi tunillatsissimasut aatsaat taama amerlatigisut nalunaarsorneqarput. Tusagassiuuteqarfiup AFP-p naatsorsugaasa tamanna takutippaat.
Naatsorsuineq taanna naapertorlugu, decembarip 22-niit 28-anut ullut tamaasa tunillatsissimasutut nalunaarsukkat agguaqatigiissillugit inuit 935.000-it tunillatsissimasutut nalunaarsorneqartarput.
Kisitsisilli taakkua nalorninartoqarsinnaasut, AFP nalunaarpoq.
Danmark-imi aamma ullumi tunillatsissimasut paasineqartut aatsaat taama amerlatigipput: Statens Serum Institut naapertorlugu tunillatsittutut nalunaarsukkat 23.228-upput, tassalu manna tikillugu amerlanerpaaffiat qaangingaatsiarlugu.
